Bibliapiqa qillqasqañam karqa Diosmanta willakuqkunata satanas qatikachananmanta (Jn 15:20; Ap 12:17). ¿Imaynatam yanapachwan qatikachasqa iñiqmasinchikkunata? Manaña waqtankupi kaspanchikpas, atichwanmi paykunapaq Diosta mañakuyta. Bibliam nin allin ruwaq runapa mañakusqantaqa Dios uyarisqanmanta (Stg 5:16).

¿Ima nispataq Diosta mañakuchwan? Mañakuchwanmi qatikachasqa iñiqmasinchikkunaman kallpata qunanpaq hinaspa mana manchakunankupaq (Is 41:10-13). Mañakuchwantaqmi, autoridadkuna Diosmanta willakunankupaq saqinanpaqpas, chaynapi ‘allinlla hinaspa hawkalla kawsakunankupaq’ (1Ti 2:1, 2).

Pablowan Pedro qatikachasqa kaptinkum, iñiqmasinkuna paykunapaq Diosta mañakurqaku sapakama sutinmanta (Hch 12:5; Ro 15:30, 31). Manaña qatikachasqa iñiqmasinchikkunapa sutinkuta yachaspanchikpas atichwanmi maypi huñunakusqankuta, ima nacionpi tarikusqankuta utaq may lawpi tarikusqankuta yachaspa Diosta paykunapaq mañakuyta.