¿IMANASQAM ANCHA ALLIN? Pi runapas Diospa piñakuyninpi salvasqa kayta munaspanqa ‘Diostam sutinmanta’ mañakunan hinaspa kasukunan (Ro 10:13, 14). Bibliamanta yachachisqanchikkunaqa manam lliwchu Diospa kamachikuyninkunataqa kasukunku. Chaymi paykunata hinalla yachachinamantaqa maskananchik Diosta kasukuspanku mana allin ruwasqankuta saqiy munaq runakunata. Yachachisqanchik runa unayña bibliamanta yachachkaspan Diospa nisqankunata mana kasukuptinqa paykunataqa manañam watukunanchikchu, aswanqa kallpanchakunanchikmi Diospaq sunquyuq kaq runakunata maskaspa paykunataña yachachinanchikpaq (Jn 6:44). Sichum yachachisqanchik runa kaqmanta Diosmanta yachayta munanqa hinaspa ‘wiñay kawsayta chaskinanpaq kallpanchakunqa’ hinaptinqa kaqmantam yachachichwan (Hch 13:48).

¿IMAYNATAM NICHWAN MANAÑA YACHACHINANCHIKMANTA?

• Yachachisqayki runata niykuy chiqap kaqmanta imam kaqta yachananpaq kallpanchakusqanqa allin kasqanta (1Ti 2:4).

• Yuyarichiy Diosmanta tukuy yachasqankunata kasukuyqa ancha allin kasqanmanta (Lc 6:46-49).

• Kuyakuywan willay tarpuq runamanta rikchanachiyta. Tapuytaq Diosta kasukunanpaq imakuna sasachasqanmanta (Mt 13:18-23).

• Ama sientichispalla niykuy imanasqa bibliamanta manaña yachachinaykimanta.

• Niykuy wakin kutipi watukuq rinaykimanta utaq qayaykunaykimanta. Niykuytaq bibliamanta kaqmanta yachayta munaptinqa yachachinaykimanta.

VIDEOTA QAWARUSPA KAY TAPUKUYKUNATA KUTICHIY:

• ¿Imanasqataq bibliamanta yachaq runaqa mana tukuy sunqunwanchu Diosmanta yachachkarqa?

• ¿Imaynatam iñiqmasinchikqa bibliamanta yachachisqan runata yanaparqa Diospa nisqankunata kasukunanpaq?

• ¿Imaynatam iñiqmasinchikqa bibliamanta yachachisqan runata nirqa munaspanqa bibliata kaqmanta estudianankupaq?