Jesusmi apostolninkunawan pascua fiestata ruwarqa, chay kutillañam chay fiestataqa ruwananku karqa. Chaymantaqa señorninchik Jesucristota yuyarinapaq huñunakuytañam ruwananku karqa. Chaymi Jesusqa Pedrotawan Juanta kamachirqa tukuy imata allichamunankupaq (Lc 22:7-13; qaway qaranpi kaq dibujota). Chaynam ñuqanchikpas 27 marzo punchawpaq allichakunanchik kanqa, chay punchawmi Jesuspa wañukusqanta yuyarisunchik. Punta apaqkunaqa yaqañachá tantiarunkuña tantawan vino kananpaq imata ruwanankumanta chaynataq tukuy imapaqpas. Ichaqa, ¿imatam sapakama ruwananchik chay punchawta listolla suyanapaq?

Puntamantaraqyá yachaykusunchik ñuqanchikpaq Jesuspa tukuy ima ruwasqanmanta. Chaypaqqa yanapawasunmi wañukunan semana Jesuspa ruwasqanmanta yachay. Chaytam tarichwan Diospa palabranpi sapa punchaw yuyaymananapaq qillqanchikpi. Tarichwantaqmi Bibliata estudianapaqmi yanapawasun niq qillqanchikpa 16 yachachikuyninpipas. Chaynataq 2020 watapi abril killapi lluqsimuq Huñunakuypi yanapawaqninchik qillqapipas. Ñuqanchikpaq Jesuspa wañupuwasqanchik imanasqa ancha allin kasqanta yachanapaqqa qawachwantaqmi Índice de las publicaciones Watch Tower niqta utaq maskachwantaqmi Jehova Diospa testigonkunapa qillqankunapi maskanapaq niqpipas.

Runamasinchikkunamanpas willasun. Lliw runamasinchikkunamanyá willasunchik Jesuspa wañukusqanta yuyarinapaq huñunakuyta uyarinankupaq. ¿Pikunatam nichwan? Nichwanmi watukusqanchik runakunata, ñawpaqta bibliamanta yachachisqanchikkunata, ayllunchikkunata chaynataq lliw riqsinakusqanchikkunata. Punta apaqkunañataqmi chiriyasqa iñiqmasinchikkunata yuyarichinanku. Huk lawpi yachaq runamasinchik chay huñunakuyman riyta munaptinqa jw.org niqpim maskachwan maypi huñunakunanpaq. Chaypaqqa ñitiy ÑUQAYKUMANTA hinaspa “Jesuspa wañukusqanta yuyarinapaq” niqpi.

¿Imatawanraqtaq ruwawaq?