Pisi tiempollañam faltan Jehova Dios kay pachapi mana allin runakunata chinkachinanpaq. Chaypaqqa pantay religionkunam chinkachisqa kanqa, chaymantam kay pachapi gobiernokuna Diospa llaqtanpa contranpi hatarinqaku. Hinaptinmi Jehova Diosqa piñakuynin punchawpi utaq Armagedon punchawpi lliw mana allin runakunata puchukachinqa. Chaytaqa llapallanchikmá suyachkanchik.

Chay llumpa-llumpay ñakariy punchaw imayna pasakunantaqa manamá allintaqa yachanchikchu nitaq imay punchaw qallaykunantapas. Manataqmi yachanchikchu gobiernokuna imata nispanku pantay religionkunata chinkachinankumantapas. Kay pachapi gobiernokunaqa ¿imata ruwaspankutaq hinaspa hayka tiempotaq Diospa serviqninkunata ñakarichinqaku? ¿Imaynatataq Jehova Diosqa puchukachinqa mana allin runakunata piñakuynin punchawpi? Manam yachanchikchu.

Chay tiempopi hawkalla kananchikpaqmi biblia yanapawanchik, chaymi mana manchakunanchikchu. Biblia leesqanchikraykum yachanchik ‘tukupay punchawpiña’ kawsakusqanchikta (2Ti 3:1). Yachanchiktaqmi Jehova Dios serviqninkunata salvananpaq ‘punchawkunata asllayachinanmantapas’ (Mt 24:22). Chaymantapas, manam iskayrayanchikchu Jehova Dios llaqtanta salvananmantaqa (2Pe 2:9). Yachanchiktaqmi señorninchik Jesucristota taytanchik Jehova Dios akllasqanmantapas, paymi piñakuynin punchawpi mana allin runakunata chinkachinqa hinaspa Diospa serviqninkunata salvanqa (Ap 19:11, 15, 16).

Kaykuna pasakuptinmi runakunaqa “manchakuymanta desmayanqaku” (Lu 21:26). Ñuqanchikmi ichaqa mana manchakusunchu. Ñawpaq tiempopi imaynata Jehova Dios llaqtanta salvasqanmanta leespanchik hinaspa yuyaymanaspanchikqa manam iskayrayasunchu Lucas 21:28 nisqanta ruwanapaqqa, chaypim nin: “Sayarispayá umaykichikta huqariychik librasqa kaynikichik hichparamusqanrayku”, nispa.