Casado vidapi allin hinaspa kusisqa kawsakuspankuqa Jehova Diostam hatunchanku (Mr 10:9). Pipas casarakuspan allin kawsakuyta munaspanqa Jehova Diospa kamachisqanman hinam akllanan piwanpas casarakunanpaq.

Casarakuy munaqkunaqa musu-sipasyasqan waytariy tiempo pasanantaraqmi suyananku. Chay tiempopiqa qariwan utaq warmiwan kayta munasqankutam mana controlayta atinkuchu (1Co 7:36). Allinmi kanman solterollaraq utaq solterallaraq kachkaspayki astawan Jehova Dioswan amistad kanaykipaq kallpanchakuyniki, chaynapi casarakuspayki allin qusa utaq allin warmi kanaykipaq.

Chaymantapas piwanpas manaraq casarakuchkaspaykim allinta riqsinayki imayna sunquyuq kasqanta (1Pe 3:4). Sichu imamantapas iskayrayaspaykiqa rimanaykim casarakunaykipaq piensasqayki warmiwan utaq qariwan. Casarakuruspaykiqa ‘manam kikikipa munasqallaykitachu ruwanayki utaq maskanayki, aswanqa warmikipa utaq qusaykipa allinnintawanmi’ (Flp 2:3, 4). Manaraq casarakuchkaspa Jehova Diospa kamachikuyninkunata kasukuptikiqa, facilmi kanqa casadoña kaspaykipas Diosta kasukuynikiqa hinaspapas kusisqam casado vidaykipi kawsakunki.

CASARAKUY MUNAQKUNAPAQ. 3 KAQ: “SUMAQTA TANTIAKUY”, NIQ VIDEOTA QAWARUSPA, KAY TAPUKUYKUNAMANTA RIMARIY:

• ¿Imaynam qallariypiqa karqaku warmi iñiqmasinchik Shane sutiyuq novionwan?

• ¿Novionta riqsisqanman hina imamantataq cuentata qukururqa?

• ¿Imaynatataq tayta-maman yanaparqa? hinaspa ¿imapaqtaq tantiakururqa?