Willaykuwayku warma kasqaykimanta

1979 watapim Estados Unidos nacionpi nacerqani. Kimsa watachayuq kachkaptiymi tayta-mamay rakinakururqa. Mamayqa judiokunapa yachachisqanman hinam taksaymanta yachachiwaq. Chaymantapas judiokunapa yachachisqan escuelamanmi churaruwarqa. Qanchis watachayuq kachkaptiyñataqmi astakurqaniku Israel nacionman, iskay-kimsa watamantañataqmi Mexico nacionmanña astakurqaniku.

Yachasqayku lawpiqa manam judiokunapa huñunakunanku wasiqa karqachu, chayna kaptinpas sabadonkunapim velata pigachiq kani, judiokunapa Tora nisqanku qillqata leeq kani hinaspa rezakunayku libropa nisqanman hina Diosta mañakuq kani. Chaymanpas estudiaqmasiykunamanmi niq kani religionniy chiqap kasqanta. Judio religionniyuqkunaqa manam creenkuchu Jesus Diospa churin kasqantaqa. Mamaypas niwaqmi: “Musuq testamentota leeruspaykiqa pantay yachachikuykunatam yacharunki”, nispa. Chaymi mana haykallapipas leerqanichu.

¿Imanasqataq musuq testamento leeyta qallaykurqanki?

17 wataypi kachkaspaymi Estados Unidos nacionman kutirqani estudioyta tukunaypaq. Huk amistadniymi niwarqa: “Allinta kawsakunaykipaqqa Jesusmantam yachanayki”, nispa. Chaymi kaynata nirqani:

—“Jesuspi iñiqkunaqa pantaypim kachkanku”, nispay.

—Payñataqmi niwarqa: “¿Yaqachu haykallapipas musuq testamentota leerqanki?”, nispa.

—Ñuqañataqmi nirqani: “Manam”, nispay.

—Payñataqmi niwarqa: “Chaynaqa, mana leechkaspaqa ¿imanasqataq chaynata ninki? Mana yachachkaspaqa manam rimanachu”, nispa.

Chay niwasqanmi piensarirachiwarqa, chaymi musuq testamento bibliata quwaptin wasiypi leenaypaq apakurqani.

¿Ima niwaqtaq leesqaykimanta?

Musuq testamentota judiokuna qillqasqankuta yacharuspaymi admirakurqani, chaymantapas leesqaypim yacharurqani Jesusqa kuyakuq, mana hatun tukuq hinaspa runakunata yanapaykuq kasqanmanta. Jesusmanta yachayta munasqayraykum paymanta rimaq sapaq librokunata maskarqani. Wakin librokunapim nirqa Jesus Dios kasqanmanta. Sichum Jesus Dios kaspanqa, ¿pitataq mañakuchkanman karqa? ¿Yaqachu kikinta mañakunman karqa? Chaymantapas bibliaqa ninmi Diosqa mana wañuq kasqanmanta, Jesusqa wañurqam, chaynaqa Jesusqa manam Diosqa kanmanchu karqa. Tukuy chaykunawanmi astawan iskayrayarurqani Jesusqa Diospa akllasqan utaq Cristo kasqanmanta. *

¿Imatataq chaymanta ruwarqanki?

Bibliamanta imam kaqta yachayta munaspaymi Diosta mañakurqani waqastin tukuy sunquymanta, chaymantapas manañam rezakunay librotaqa servichikurqaniñachu. Chaymi Diosta mañakusqay qawallanta punkuyta takaykamuwarqaku Jehova Diospa testigonkuna. Paykunam saqiwarqaku huk folletota, chaytam leerurqani, chaymi sapa kuti watukamuwaspanku bibliamanta yachachiwaptinku cuentata qukurqani paykunapa yachachisqankuqa bibliapa nisqaman hina kasqanta. Jehova Diospa testigonkunapaqqa Jesusqa manam Dioschu, * aswanqa Diospa churinmi chaynataq “Diospa unanchasqankunamanta punta kaqmi”. *

Chaymantam Mexico nacionman kutirqani, chaypipas hinallam Jehova Diospa testigonkunawan estudiarqani bibliapi willakuykuna imayna Jesuspi cumplikusqanmanta. Estudiachkaspaypas hinallam iskayrayarqani, chaymi sunquypi tapukurqani: “¿Jesusllapichu bibliapi willakuykunaqa cumplikunman karqa, icha runakunata pantachinallanpaqchu tukuy imata ruwarqa?”, nispa.

¿Imakunataq yanapasurqanki manaña iskayrayanaykipaq?

Jehova Diospa testigonkunam bibliawan qawachiwarqaku Belen llaqtapi Cristo nacenanmanta Miqueaspa willakusqanta, chaytaqa qillqarqa 700 wata ñawpaqtaraqmi. * ¿Yaqachu Jesusqa akllakunman karqa maypi nacenanpaq? Manamá. Chaymantapas Isaiasqa qillqarqam Cristo imayna wañuchisqa kananmanta hinaspa apukunapa sepulturanpi pampasqa kananmanta. * Tukuy chay willakuykunaqa Jesuspipunim cumplikurqa.

Chaymantapas Jesus pipa mirayninmanta kasqanta yachasqaymi astawan yanapawarqa mana iskayrayanaypaq. Bibliam willawanchik Cristoqa Davidpa mirayninmanta kasqanta. * Chay tiempopi judiokunaqa qillqaqkum pipa mirayninmanta kasqankuta. Sichum Jesus Davidpa ayllunmanta mana kaptinqa llapa enemigonkunach sutillata ninmanku karqa “payqa manam Davidpa mirayninmantachu” nispanku. Ichaqa manamá chaynachu karqa, aswanqa yaqa llapallan runakunam riqsirqaku ‘Davidpa churinwan’. *

70 watapim Roma nacionpi tropakuna Jerusalenman yaykuruspanku llaqtata kañarurqaku, chaypim ruparurqa ima ayllumanta kasqankuta qillqasqanku listakunapas. Chaymi Cristo ima ayllumanta kasqanta sumaqta yachanankupaqqa nacenan karqa manaraq tukuy chaykuna pasakuchkaptin.

Kunanqa, ¿ima ninkitaq?

Deuteronomio 18:18, 19 nisqapim Dios nirqa Moises hina willakuqta Israel kastamanta akllananpaq. Chaypim nirqaraq: ‘Ñuqapa sutiypi paypa rimasqanta mana kasukuqkunataqa ñuqam cuentata mañasaq’, nispa. Chaymi kunanqa bibliata llapanta sumaqta estudiaruspay seguropuni kachkani chay Diospa prometesqan willakuqqa Jesuspuni kasqanmanta.