Kuyasqa wawqi-panillaykuna:

Iskay waranqa suqta pachak wata ñawpaqtaraqmi, Diosmanta willakuq Ezequiel musquyninpi hina rikururqa ruedayuq hatunllay-hatun carretata. Chay rikusqan carretaqa Diospa apasqanmi kasqa, hinaspapas bala hinañam kallpaq, huk qimchiyllapim may lawmanpas riq (Ezeq. 1:4, 9, 12, 14, 16-27).

¿Imatam Ezequielpa rikusqan yachachiwanchik? Yachachiwanchikmi Jehova Diospa hanaq pachapi yupaychaqninkuna mana samaykuspa ima ruwaytapas hinalla ruwasqankumanta. ¿Ima nichwantaq kay pachapi yupaychaqninkunamanta? Paykunapas mana samaykuspam Diospa yanapakuyninwan utqayman llamkachkanku. Qayninpa watapa septiembre killamanta qayna wata septiembre killakama enteron allpa pachapi tukuyta ruwasqankum chayta qawachin.

Estados Unidos Betel wasipi yanapakuqkunam wakinqa Brooklyn lawmanta Warwick lawman astakurqaku, wakinñataq huk lawkunaman astakurqaku. Wakinqa manañam Betelpiñachu kanku. Wakin nacionkunapiñataqmi Betel wasipi llamkaqkunaqa anchata llamkarqaku Betel wasikunata ruwaypi utaq allichaypi, wakinñataqmi huk law llaqtakunaman astakurqaku. Qamkunaqa manapaschá maymanpas astakurqankichikchu, ichaqa atisqaykichikman hinachá ima ruwaypipas yanapakurqankichik.

Jehova Diospa munayninta ruwaypi kallpanchakusqaykichikta qawaspaykum Diospa llaqtanpi punta apaqkunaqa kallpanchasqa chaynataq kusisqa tarikuniku. Wakin llaqtakunapiqa asllam kanku Diosmanta willakuqkunaqa, wakiqnikichikqa chay llaqtakunapi yanapakunaykichikpaqmi astakurqankichik. Wakinnikichikñataqmi huk rimayta yachaspa chayna rimayniyuqkunaman Diosmanta willachkankichik. Wakinnikichikpas ima ruwaypipas yanapakunaykichikpaqmi astawan tiempochakuchkankichik. Jehova Diosman sunqu kaqkunaqa yuyaqña kaspaykichikpas utaq unquspaykichikpas kallpachkaq hinam mana pisipaspa Diospa munayninta hinalla ruwachkankichik, chaywanmi qawachichkankichik satanasqa llulla kasqanta (1 Cor. 9:24).

Jehova Diosqa qawamuchkanmi paypa kamachisqanta ruwanaykichikpaq tukuy sunquwan kallpanchakusqaykichikta (Heb. 6:10). Qamkunaqa Abrahantawan Saratam qatipakuchkankichik. Abrahanqa qanchis chunka wata masniyuqñam wasinpi kaqkunapiwan Ur llaqtamanta Canaan llaqtaman ripukurqa. Payqa chay lawpim wañukunan punchawkama pachak watapuni chukllachakunapi yacharqa. Abrahanqa warmichanpiwanmi tukuy imata saqispanku Diospa nisqanta ruwarqa (Gen. 11:31; Hech. 7:2, 3).

Chaymi sunqunchikpi sapakama tapunanchik: “¿Paykuna hinachu kani?”, nispa. Kay tukupay punchawkunapi hinalla Diosman sunqu kaqkunaqa Jesuspa kamachisqantam ruwachkanchik. Paymi kamachiwaspanchik nirqa: “Chaynaqa llapallan nacionpi runakunaman rispayá yachachimuychik qatiqniykunaña kanankupaq, hinaspayá bautizamuychik hanaq pacha taytapa, churinpa hinaspa chuya espiritupa sutinpi”, nispa (Mat. 28:19).

 Imaynam maymanpas rinanchik kaptinqa tiyasqanchikmanta hatarinchik, chaynatas Jesuspa ‘riychik’ niwasqanchiktapas kasukunanchik. ¡Mayna kusikuypaqmi qayna wata tukuy ima ruwasqanchikmanta yachasqanchikqa! Sutillamá qawanchik enteron pachapi willakunanchikpaq Diospa yanapawasqanchikta (Mar. 13:10).

Achka runakunam Jehova Diosmanta yachachkanku. Qayna watam Diosmanta willakuqkuna yapakururqanchik 8.340.847 nisqaman. Bibliamantañataqmi sapa killa yachachirqanchik 10.115.264 nisqa runakunaman. Chaywanmi qawanchik hanaq pachapi Diospa llaqtanpas chaynataq qamkunapas mana samaykuspa hinalla llamkasqaykichikta. Chaynaqa hinallayá runakunaman yachachinapaq kallpanchakusun Jehova Diosninchik “kaykamallañam” nispa niwananchikkama.

Kay watapaq textom nin: “Jehova Diosman hapipakuspayá allinta ruway”, nispa (Sal. 37:3). Chayna nisqanta kasukuspaqa allin kaqkunata ruwaspam Jehova Diospi hapipakusqanchikta qawachisun. Manam sapallanchikchu kachkanchik, Jesusmi nirqa: “Sapa punchawmi ñuqaqa qamkunawan kasaq kay tiempopa tukupayninkama”, nispa (Mat. 28:20). Payqa manam haykapipas saqiwasunchu.

Diospaqqa manam imananchu achkata utaq asllata ruwaptinchikqa, ichaqa atisqanchikman hinam tukuy sunqunchikwan niwasqanchikta ruwananchik. Chaynata ruwaspaqa sunquntam kusichisunchik (2 Cor. 9:6, 7). Chaynaqa hinallayá Diosta mañakusun, palabranta ñawinchasun hinaspa tukuy sunqunchikwan paymanta willakusun. Chaynata ruwaspaqa paymanmi astawan asuykusun hinaspapas astawanmi kuyachikusun.

Satanasqa “yachakunmi pisi tiempoyuqllaña kasqanta”, chaymi astawan kallpanchakuchkan Jehova Diosmanta karunchawananchikpaq (Apoc. 12:12). Payqa hinallam tukuyta ruwanqa Diosmanta karunchawananchikpaq. Ichaqa Jehova Diospi tukuy sunqunchikwan hapipakuptinchikqa manam Diosmantaqa karunchawasunchu (Sal. 16:8). Wawqi-panillaykuna anchatam kuyaykiku, anchatataqmi agradecekamuykiku kay tukupay tiempopi Diospa munayninta ruwaypi yanapawasqaykikumanta.

Diospa llaqtanpi punta apaqkuna