37 KAQ YACHACHIKUY

¿Bautizakunayñachu?

Qatiqnin tapukuykunamanta, ¿ima niwaqtaq?

¿Llapallanchikchu bautizakunanchik?

□ Arí

□ Manam

¿Bautizakunanchikqa huchaman mana wichiykunapaqchu?

□ Arí

□ Manam

¿Bautizakuyqa yanapawanchikchu salvasqa kanapaq?

□ Arí

□ Manam

¿Mana bautizakuspaqa munasqanchikman hinachu purikuchwan?

□ Arí

□ Manam

¿Wiñaymasinchik bautizakusqanraykuchu bautizakunanchik?

□ Arí

□ Manam

¿DIOSPA kamachisqanman hinachu kawsakunki? ¿Munankichu Dios kasukuyta? ¿Pimanpas willankichu Diosmanta? Sichu “arí” ninki, hinaspaqa piensachkankiñachá bautizakuyta, ichaqa sumaqtam tantiakunayki. Bautizakunaykipaq hinaña kasqaykita yachanaykipaqmi yuyaymanawaq qallariypi yana letrapa nisqankunapi.

● ¿Llapallanchikchu bautizakunanchik?

Arí. Jesusmi kamachirqa paypi iñiqkunaqa bautizakunankupaq (Mateo 28:19, 20). Kikin Jesuspas bautizakurqam. Chaymi ñuqanchikpas bautizakunanchik ichaqa sumaqtam tantiakunanchik hinaspapas Diosta kasukuspañam kawsakunanchik manaraq bautizakuchkaspapas.

● ¿Bautizakunanchikqa huchaman mana wichiykunapaqchu?

Manam. Bautizakunchikqa Jehova Diosllapaqña kawsakuy munaspam hinaspa chayta runakunapas yachanankupaqmi. Jehova Diosllapaqña kawsakuytaqa munanchik payta kuyasqanchikraykum, manam huchallikuymanta harkawananchikta munaspallachu.

● ¿Bautizakuyqa yanapawanchikchu salvasqa kanapaq?

Arí. Bibliapiqa ninmi bautizakuyqa salvakunapaq yanapawasqanchikta (1 Pedro 3:21). Ichaqa manam salvakuyta munaspallachu bautizakunanchikqa aswanqa sunqumanta Diosta kuyaspanchikmi (Marcos 12:29, 30).

● ¿Mana bautizakuspaqa munasqanchikman hinachu purikuchwan?

Manam. Bibliapim nin pipas bautizasqa utaq mana bautizasqa kachkaspanpas Diospa kamachikuyninta yachachkaspan ‘mana ruwaspanqa huchallikusqanta’ (Santiago 4:17). Chaymi yuyaymananayki Jehova Dios imayna kawsakunaykita munasqanpi. Diospa munasqanman hina kawsakuyta munaspaykiqa niykuwaqmi tayta-mamaykita utaq huñunakusqaykipi punta apaqkunata bautizakuy munasqaykita. Paykunam nisunki bautizakunaykipaq hinaña kasqaykita utaq manaraqpas.

● ¿Wiñaymasinchik bautizakusqanraykuchu bautizakunanchik?

Manam. Bautizakunaqa sapakama sumaqta tantiaykuspam (Salmos 110:3). Tantiakunanchikpas Jehova Diosta kasukuspa kawsakuy imayna kasqanta sumaqta yachaykuspam. Hinaspapas bautizakuytam sunqumanta munananchik (Eclesiastes 5:4, 5).

Bautizakuyqa allinnikipaqmi

Bautizakuruspaqa astawanmi Diospaq imatapas ruwayta atisun hinaspam kusisqa kawsakusun. Manataqmi qunqananchikchu manaraq bautizakuchkaspa Diosllapaqña kawsakunanchikpaq tantiakusqanchiktapas.

¿Bautizakunaykipaqchu tantiakurunki? Chayqa, ¡mayna sumaqmi! Jehova Diosta sunqumanta servikuspa kusisqa kawsakuyqa manam imawanpas tupanmanchu (Mateo 22:36, 37).

QATIQNIN YACHACHIKUYPIM YACHASUNCHIK

Diosta servispaqa kusisqa kawsakunanchikmanta.

BIBLIAM NIN

“Cuerpoykichikta Diosman quychik chuyay-chuyayta hinaspa paypa chaskinanpaq hinata, chayqa tukuy yuyayninchikwan Diosta serviymi” (Romanos 12:1).

KAYTAM RUWAWAQ

¿Pi iñiqmasinchikkunataq yanapasunkiman bautizakuyman chayanaykipaq? Chayta yachaykunaykipaq tayta-mamaykita tapuykuy (Hechos 16:1-3).

KAYPI YUYAYMANAY

Bautizakuyqa yanapawasunmi salvasqa kananchikpaq (Ezequiel 9:4-6)

IMATA RUWANAYKIPAQ QILLQAY

Kay yachachikuykunamanta astawan yachaykusaq bautizakunaypaq: ․․․․․

Astawan yachanaypaqmi tayta-mamayta kaymanta tapusaq: ․․․․․

QAMQA, ¿IMA NIWAQTAQ?

● ¿Bautizakuyqa pukllay hinallachu?

● ¿Imanasqataq wakin warmakunaqa mana sumaqta tantiaykuspa bautizakunku?

● ¿Imanasqataq wakin warmakunaqa unanku bautizakunankupaq?

[Willakuy]

“Bautizasqa kasqayqa yanapawanmi mana allinkunata mana ruwanaypaq” (Noemi).

[Recuadro]

Bautizakuy munaqkunam kaynata tapukunku

¿Imapaqmi bautizakunay? Bautizakunaykiqa Diosllapaqña kawsakunaykipaqmi. Bautizakusqayki punchawpim yakupi challpuykusuptiki hukkunapas yachanqaku ñawpaq vidaykita saqispa Diosllapaqña kawsakunaykipaq tantiakusqaykita.

¿Imanasqataq payllapaqña kawsakunaykipaq Jehova Diosta ninayki? Diosllapaqña kawsakunaykipaq nispaykiqa nichkankim Diospa munasqanman hinaña kawsakunaykipaq, manaña kikikipa munasqaykiman hinañachu (Mateo 16:24). Chaymi manaraq bautizakuchkaspayki mañakuspa Jehova Diosta ninayki imamantapas puntataqa paypa munasqanta ruwanaykipaq.

¿Imaynañam kawsakunayki manaraq bautizakuchkaspayki? Manaraq bautizakuchkaspaykipas bibliapa nisqanman hinañam kawsakunayki, hukkunamanpas Diosmantam willanayki, chaymantapas tiempochakunaykim Diosmanta yachanaykipaq hinaspa mañakunaykipaq. Jehova Diostaqa servinayki kikikimantam manam hukkuna nisuptikichu.

¿Hayka wataykipitaq bautizakuwaq? Hayka wataykipi kaspaykipas bautizakuytaqa atiwaqmi ichaqa sumaqtam yachanayki imapaq bautizakusqaykita.

¿Bautizakuyta munaptikipas tayta-mamay suyayraq nisuptikiqa? Tayta-mamayki suyayraq nisuptikiqa ama hukmanyaruychu, aswanqa hinalla kallpanchakuy Diosta kasukunaykipaq hinaspa kuyanaykipaq (1 Samuel 2:26).

[Recuadro]

Qillqaykuy imakunapi kallpanchakunaykipaq

¿Bautizakuytachu munachkanki?

Qatiqninpi tapukuykunam yanapasunki bautizakunaykipaq hinaña kasqaykita yachanaykipaq. Bibliapi maskanapaq kaptinqa maskaykuspa leeykuy.

¿Jehova Diospi hapipakuspachu kawsakunki? ¿Diospi hapipakusqaykitachu hukkunapas ninku? (Salmos 71:5). ․․․․․

¿Yachankichu Diospaqa ima allin utaq ima mana allin kasqanta? ¿Imakuna kaptintaq Jehova Diospa kamachisqanta kasukurqanki? (Hebreos 5:14). ․․․․․

¿Sapa kutichu Diosta mañakunki? ․․․․․

¿Diosmanqa sunquykipi tukuy ima kaqtachu willakunki? Diosman tukuyta willakuptikiqa, ¿sutillachu payta kuyasqayki? (Salmos 17:6). ․․․․․

¿Imaynatataq aswan sumaqtaraq Diosta mañakuwaq? ․․․․․

¿Tiempochakunkichu bibliamanta astawan yachanaykipaq? (Josuey 1:8). ․․․․․

Bibliamanta yachanaykipaq tiempochakuspayki, ¿imakunamanta yachanaykipaqmi kallpanchakunki? ․․․․․

¿Imakunamantawanraqmi yachayta munawaq? ․․․․․

¿Kallpanchakunkichu sumaqta Diosmanta willakunaykipaq? (¿Atinkichu bibliamanta yachasqaykita runakunaman willakuyta? Pitapas yachay munaqta tariruspaykiqa, ¿kutinkichu yachaykachinaykipaq?)

□ Arí □ Manam

Tayta-mamayki Diosmanta willakuq mana riptinkupas, ¿qamqa rinkichu? (Hechos 5:42).

□ Arí □ Manam

¿Imakunapim kallpanchakuyta munawaq Diosmanta sumaqta willakunaykipaq? (2 Timoteo 2:15). ․․․․․

¿Kallpanchakunkichu huñunakuykunaman rinaykipaq? Icha, ¿manachu? (Hebreos 10:25). ․․․․․

¿Yanapakunkichu huñunakuykunam rispapas? ․․․․․

Tayta-mamayki huñunakuykunaman mana riptinkupas, ¿qamqa rinkichu?

□ Arí □ Manam

¿Kusikunkichu Diosta kasukuspayki? (Salmos 40:8).

□ Arí □ Manam

Warmamasikikuna mana allinta ruwanaykipaq hikutasuptiki, ¿Diosta kasukusqaykita yuyachkankichu? (Romanos 12:2). ․․․․․

Jehova Diosmanta mana haykapipas karunchakurunaykipaq, ¿imakunatam hinalla ruwanayki? (Judas 20, 21). ․․․․․

Tayta-mamayki utaq amistadnikikuna Dios serviyta saqiruptinkuqa, ¿qamqa hinallachu Diosta serviwaq? (Mateo 10:36, 37).

□ Arí □ Manam

[Dibujo]

Casarakuqkunaqa sumaqta tantiakuspankum casarakunku chaynallataqmi sumaqta tantiakuykuspa bautizakunaqa