Bibliam imayna kawsasqanta cambiarqa

¿IMAM huk runata yanaparqa kaqmanta Diosman asuykunanpaq? ¿Imaynatam huk musu mana haykapipas saqiqnin taytanta tarirurqa? Chaymantayá kikinku willawasun.

“Jehova Diosman kutiytam munaq kani” (ELIE KHALIL)

NACESQAN WATA: 1976

NACIONNINMI: CHIPRE

HUK WILLAKUYKUNA: MUNASQANPI KAWSAKUQMI KARQA

ÑAWPAQ VIDAY: Chipre nacionpim nacerqani, ichaqa Australia nacionpim wiñarqani. Tayta-mamayqa Jehova Diospa testigon kasqankuraykum Diosta kasukunaypaq yachachiwaq, ichaqa wiñasqayman hinam mana kasukuq rikurirurqani. Tutankunam wiñaymasiykunawan carrokunata suwakuq kaniku, chayraykum sasachakuykunallapiña tarikuq kani.

Tayta-mamay yacharuspan mana piñakuwananpaqmi qallariypiqa mana pipa yachasqallanta suwakuq kani. Chaymantam ichaqa manaña pinqakuspa suwakuq kani. Amistadniykunaqa ñuqamanta mayorkunam karqa, hinaspapas paykunaqa manam Jehova Diostaqa kuyaqkuchu. Paykuna hina kaytañam qallaykurqani, chaymi tayta-mamaytapas huk kutipi niykurqani manaña Diosmanta yachayta munasqayta. Paykuna kuyakuywan yanapawayta munaptinkupas manam munarqanichu, chaymi anchata llakikurqaku.

Wasimanta ripukuspaymi drogakuyta qallaykurqani. Marihuanatam achkanpi rantikuyta hinaspa plantayta qallaykurqani. Hukwan-hukwanmi warmiwanpas kakuq kani, hinaspapas fiestakunallapiñam kaq kani. Piñakuqllaña runataqmi rikurirurqani, imapas mana gustawasqanta pipas rimaruptinkuqa utaq ruwaruptinkuqa piñakuspaymi wakinpiqa maqaparuqraq kani. Arí, Diosta mana serviqkunapa tukuy mana allinkuna ruwasqankutam ruwayta qallaykurqani.

VIDAY CAMBIANAYPAQMI BIBLIA YANAPAWARQA: Huk drogakuq runapa amistadninmi rikurirurqani, paypa taytanmi taksallaraq kachkaptin wañukusqa. Paywanmi tutakama rimaq kaniku, chayna rimasqaykupim niwaq papanmanta ancha llakisqa kasqanta. Ñuqañataqmi warma kasqaymantaraq kawsarimuymanta yachasqayrayku ñawpaq tiempopi wañuqkunata Jesus kawsarichisqanmanta chaynataq hamuq tiempopipas kawsarichinanmanta willayta qallaykurqani (Juan 5:28, 29). Kaynatam niq kani: “¡Mayna kusisqaraq tarikunki papaykita kaqmanta rikuykuspaqa! Chaypiqa sumaq huertapim llapallanchik wiñaypaq kawsakusun”, nispa. Chayna nisqaymi sunqunman chayarurqa.

Wakin kutikunapiñataqmi chay amistadniyqa rimapayawaq tukupay punchawmanta hinaspa hukllapi kimsa dioskuna kasqanmanta. Ñuqañataqmi bibliawan qawachiq kani tukupay punchawmanta chaynataq Jehova Dioswan Jesusqa mana chaynalla kasqanmanta (Juan 14:28; 2 Timoteo 3:1-5). Diosmanta sapa kuti rimapayaspaymi Jehova Diospi astawan piensaq kani.

Pisi-pisimantam warmallaraq kachkaptiy tayta-mamaypa bibliamanta yachachiwasqankunata yuyariyta qallaykurqani. Wakinpiqa amistadniykunawan fiestakunapi drogakuchkaptiykum Jehova Diospi piensayta qallaykuq kani. Yaqa llapallan amistadniykunam “ñuqapas Diostaqa kuyanim” nichkaspankupas Diospa chiqnisqan kaqkunata ruwaqku. Chaymi ñuqaqa iskay uya kayta mana munaspay Jehova Diosman kutinaypaq tantiakururqani.

Arí, manamá chaynallachu imatapas yachaywan kasukuyqa. Manamá sasachu karqa drogakuyta hinaspa mana allin amistadniykunata saqispay huk testigowan biblia estudiayta qallaykuyqa.

Chaylla piñakuq runa kayniytam ichaqa sasata cambiarqani, allin kachkaspaymi wakinpiqa piñakuspay mana valeqpaq hapikuyta qallaykuq kani. Chayna kasqaymantam bibliamanta yachachiwaqniywan rimarqani, payñataqmi pacienciakuspan kuyakuywan kallpanchaykuwaq. Huk kutipim niwarqa mana hukmanyaspa hinalla kallpanchakunamanta yachachikuyta Willakuq qillqanchikpi leenaypaq. * Paywan kuskam rimarqaniku piñasqa kaspay imakunata ruwanaypaq, chay qillqanchikpa nisqanmi hinaspa Jehova Diosta mañakusqaymi yanapawarqa manaña piñakuq kanaypaq. Chaymi 2000 watapa abril killanpi bautizakururqani. Chaywanqa anchatamá tayta-mamayqa kusikurqaku.

BENDICIONKUNA CHASKISQAYMANTA: Kunanqa hawkañam tarikuni, manañam drogakuniñachu nitaq warmikunawanpas hukwan-hukwanqa kanichu. Llamkayniypipas, huñunakuypipas chaynataq maypiña kaspaypas kusisqam tarikuni.

Jehova Diostam ancha-anchata agradecekuni tayta-mamay mana qunqaruwasqanmanta. Piensanitaqmi Jesuspa nisqanpipas, paymi nirqa: “Manam pipas ñuqamanqa hamunmanchu kachamuwaqniy taytay mana pusamuptinqa”, nispa (Juan 6:44). Ancha kusisqam tarikuni kutimunaypaq Jehova Dios yanapawasqanmanta.

“Taytayuq kaytam munarqani” (MARCO ANTONIO ALVAREZ SOTO)

NACESQAN WATA: 1977

NACIONNINMI: CHILE

HUK WILLAKUYKUNA: DEATH METAL MUSICA TOCAQ

ÑAWPAQ VIDAY: Mamaywanmi Punta Arenas llaqtachapi yacharqaniku, chayqa kachkan machu-machu botekunapa purinan Magallanes sutiyuq lamar quchapa patanpim. Tukuy chayqa kachkan continente americano nisqankupa sur lawninpiñam. Pichqa watayuq kachkaptiymi tayta-mamay rakinakuruptin papay ripukurqa, hinaptinmi taytaymanta llumpayta waqarqani taytayuq kayta munaspay.

Mamayqa Jehova Diospa testigonkunawanmi bibliata estudiaq, hinaspam huñunakuykunamanpas pusawaq. Ñuqañataqmi riyta mana munaqchu kani, chaymi pusawaptinpas tukuywan mamayta rabiachiq kani. 13 wataypiñataqmi huñunakuykunaman riytaqa manaña munarqanichu.

Musica tocaytam anchata gustaq kani, chaymi 15 wataypi heavy-metal hinaspa death-metal nisqan musicata tocapakuspay fiestakunapi purikuq kani. Hichu-hichu tocaqkunawan hukllawakusqayraykum musica clasica nisqankutapas gustaqña kani. Chaymi musica yachachinanku wasipi estudiayta qallaykurqani. 20 wataypiñataqmi Chile nacionpa capitalnin Santiago llaqtamanña musica estudiaq pasakurqani. Chaypipas hinallam heavy-metal hinaspa death-metal nisqan musicata grupokunapi tocapakuq kani.

Gustasqayta ruwaspaypas manam kusisqachu karqani. Chaymi sunquyta tiyachinaypaq grupoypi kaqkunawan sinkakuq kani hinaspa drogakuq kani, paykunaqa aylluy hinañam karqa. Munasqayta ruwasqayraykum yana pachakunawan pachakuq kani, barbaytapas hatu-hatuntam wiñarachirqani, chukchaytapas wiqawniykamam wiñarachirqani.

Mana ima niykuna kasqayraykum piwanñapas piñanakusqayrayku policiakunaman sapa kuti chayaq kani. Huk kutipim droga rantikuqkuna ñuqaykumanta asikuchkarqaku. Chaymi maqanaypaq sinka pawaykurqani, hinaptinmi kakichuypas pakinankama maqaruwarqaku.

Chayna kaptinpas astawanqa nanawarqa amistadniykunapa ruwawasqanmi. Riqsinakusqay sipasmi mana yachasqallayta amigoywan unay wataña kakusqa, wakin amistadniykunapas pakawasqam. Chay ruwawasqankum astawanqa nanawarqa.

Chaymi Punta Arenas llaqtayman kutikurqani, hinaspam machu-machu violinwan musicata yachachispay llamkapakurqani. Grabaqtaqmi kaniku heavy-metal hinaspa death-metal nisqatapas. Chaynapim riqsirurqani Sussan sutiyuq kuyayllapa sipasta, hinaspam kuskaña yacharqaniku. Sussanpa mamanmi niq hukllapi kimsa dioskuna kasqanta, ñuqapaqñataqmi mana chaynachu karqa. Chayta yacharuspanmi Sussanqa niwarqa: “¿Imaynataya yachachwan ima cierto kasqanta?”, nispa. Pantay kasqanta nispaypas manam bibliapi maskayta atirqanichu. Chaymi Jehova Diospa testigonkuna bibliamanta sumaq yachasqankuta nirqani. Una-unay watamantam Jehova Diosta yanapaykuwananpaq mañakurqani.

Chaymanta qipallanmanmi Jehova Diospa testigon kaqlla runata rikururqani, hinaspam “testigochu kanki” nispa tapurqani. Imayna kasqaywan mancharikuspanpas maypi huñunakuykuna kasqantam willawarqa, Diosmá uyariykuwarqa. Huñunakuna wasimanmi rirqani hinaspam punku lawllapi mana pipas rikuwananpaq tiyaykurqani, ichaqa warma kaspay risqayraykum riqsiruwarqaku hinaspam kuyakuyllawanña abrazaykuwaptinku hawka tarikurqani. Wasiyman kutiruyman hinaraqmi tarikurqani. Warma kaptiy bibliamanta yachachiwaqniyta rikuruspaymi nirqani kaqmanta yachachiwananpaq.

VIDAY CAMBIANAYPAQMI BIBLIA YANAPAWARQA: Huk kutipim Proverbios 27:11 * nisqanta leerqani. Chaypim nin: ‘Churilláy, yachayniyuq kaspayá kusiriykachiy sunquyta’, nispa. Anchatam kusikurqani huchasapa runa kaspapas tukuy ima unanchaq Diospa sunqunta kusichiy atinaymanta yacharuspay. Paymi karqa tukuy tiempo maskasqay papaymantapas mana saqiwaqniy taytaqa.

Chayraykum munayninta ruwaspay Jehova Diosta kusichiyta munarqani. Ichaqa unay wata drogakuqllaña hinaspa sinkakuqllaña kasqayraykum mana atirqanichu. Mateo 6:24 versiculopim nin: “Manam pipas iskay patrontaqa servinmanchu”, nispa. Chaypi Jesuspa ima niy munasqantam entienderurqani. Chaymantapas 1 Corintios 15:33 versiculopi nisqanmi anchata yanapawarqa, chaypim nin: “Mana allin amistadkunaqa allin kawsakuytam chinkachin”, nispa. Cuentatam qukurqani punta amistadniykunawan hinalla hukllawakuspayqa mana allinkuna ruwasqayta mana saqiy atinaymanta. Imam kaqtam bibliapiqa nichkarqa, saqinaypunim karqa mana allinman apawaqniy kaqkunataqa (Mateo 5:30).

Musicata anchata kuyasqayraykum heavy-metal nisqan musica tocapakuyniyta saqiyqa sasa karqa. Jehova Diospa testigon kaq amistadniykunapa yanapakuyninwanmi atirqani. Saqirurqanim drogakuyta hinaspa sinkakuyta, chukchaytapas ruturachikurqanim, barbaytapas siksikururqanim, manañataqmi yanallawanñachu pachakuq kani. Chukchay ruturachikusqayta qawaspanmi Sussanqa paypas huñunakuykunaman riyta munarqa. Kusisqallañam biblia estudiayta qallaykurqa, chaymantam casarakururqaniku hinaspam 2008 watapi iskayniyku bautizakururqaniku. Kunanqa Jehova Diospa testigonña kaspaykum mamaywan kuska Jehova Diosta serviniku.

BENDICIONKUNA CHASKISQAYMANTA: Yanqalla kusisqa kawsakuytam saqirqani, traicionakuq amistadkunatam saqirqani, musicata kuyaspaypas allin kaqllantañam uyarini. Vidaymanta willaspaymi aylluytapas hinaspa huk runakunatapas rimapayani, aswanraqmi musu-sipaskunataqa. Paykunaqa allinpaqmi hapinku runakunapa ruwasqankutaqa, ichaqa wischusqa basura hinallam tukuy chayqa (Filipenses 3:8).

Diosman asuykusqayraykum kunanqa mana traicionakuq amistadniyuqña kani, paykunaqa kuyakuqllañam kanku hinaspapas hawkam kawsakunku. Aswan allinraqmi karqa mana haykapipas saqiwaqniy Jehova Dios taytayta tarisqayqa.

[Nota]