Bibliam imayna kawsasqanta cambiarqa

¿Ancha sasachakuypi tarikuq sipas imaynatam kusisqa kawsakurqa? ¿Imataq yanaparqa mana allin ruwaq politico runata Jehova Diostaña servinanpaq? Saqiykusunchik paykuna willawananchikpaq.

“Munarqanim aylluy kuyawananta” (INNA LEZHNINA)

NACESQAN WATA: 1981

NACIONNINMI: RUSIA

HUK WILLAKUYKUNA: WARMALLARAQ KASPAYMI ANCHA SASACHAKUYPI TARIKURQANI

ÑAWPA VIDAN: Tayta-mamayqa manam uyariyta atiqkuchu, chaynam ñuqapas nacerqani. Suqta wataykamam kusisqa kawsakurqani. Chaymantam tayta-mamayqa rakinakururqaku, chaymi anchata llakichiwarqa. Mayorniymi Troick sutiyuq llaqtapi taytaywan qipakurqa, mamayñataqmi pusawarqa Cheliabinsk sutiyuq llaqtaman. Tiempopa risqanwanmi kaqmanta mamayqa casarakururqa. Mamaypa yapakusqan qusanqa anchatam tragota tomaq, chayrayku iskayniykuta maqawaqku.

1993 watapim mayor kaq turiy yakupi hiqiparuspan wañukurqa. Llapaykum anchata llakikurqaniku, chaymi mamayqa trago tomayman qukururqa hinaspanmi ñuqatapas maqawaq. Ñuqaqa munarqanim kusisqa kawsakuyta, munarqanim aylluy kuyawananta, chaymi achka iglesiapi maskarqani yanapakuyta ichaqa manam tarirqanichu.

BIBLIAM VIDAYTA CAMBIARURQA: 13 wataypi kachkaptiymi estudiaqmasiy Noeymanta, Davidmanta hinaspa hukkunamanta willawarqa. Payqa Jehova Diospa testigonmi karqa. Ñuqataqa gustawarqam Noeymantawan, Jobmanta uyariy, paykunaqa ima sasachakuypiña tarikuspankupas hinallam Jehova Diosta servirqaku. Pisi tiempollamantam testigokunawan biblia estudiayta hinaspa huñunakuyman riyta qallaykurqani.

Jehova Diospa palabranpim tukuymanta yacharurqani. Kusikurqanim Jehova Diospa sutinta yacharuspay (Salmos 83:18). Yacharurqanim bibliapa nisqanman hina “tukupay punchawkunapi” kawsakusqanchikrayku sasachakuykuna kasqanta (2 Timoteo 3:1-5). Wañuqkuna kawsarimunankumanta yachaspaymi kusikurqani “kaqmantam turiywan tupaykusaq”, nispay (Juan 5:28, 29).

Manam llapallankuchu kusikurqaku bibliamanta yachasqaywanqa, mamaywan chaynataq padrastroyqa manam munarqakuchu testigokunawan bibliata estudianaytaqa, chaymi niwarqa bibliata estudiasqayta saqinaypaq. Ñuqam ichaqa hinalla kallpanchakurqani bibliamanta yachasqay anchata yanapawasqanrayku.

Chayna kachkaptiykum sullkay yakupi hiqiparuspan wañukurqa, paywanqa riqmi kaniku huñunakuyninchikkunamanpas. Chayna llakipi tarikuptiymi iñiqmasinchikkuna yanapaykuwarqa. Paykunapim tarirurqani kuyakuq maskasqayta. Jehova Diospa testigonkuna chiqap religion kasqanta yacharuspaymi  1996 watapi bautizakururqani.

KUSISQAÑAM KAWSAKUNI: Suqta watañam casado kachkani Dmitry sutiyuq iñiqmasinchikwan. Iskayniykum llamkachkaniku Betel wasipi, San Petersburgo llaqtapi. Tiempopa risqanman hinam tayta-mamayqa manaña piñakurqachu Jehova Diospa testigon kasqaymantaqa.

¡Ancha kusisqam tarikuni Jehova Diosta riqsisqaywan! Kunanqa tukuy vidaywanmi Jehova Diosta servichkani.

“Yachaytam munarqani imanasqa ñakarisqanchikmanta hinaspa wañusqanchikmanta” (RAUDEL RODRIGUEZ RODRIGUEZ)

NACESQAN WATA: 1959

NACIONNINMI: CUBA

HUK WILLAKUYKUNA: POLITICO RUNAM KARQA

ÑAWPA VIDAN: Cuba nacionpim Habana llaqtapi nacerqani, wakcha hinaspa maqanakuq runakunapa kasqan lawpim wiñarqani. Chaymi jovenllaraq kaspayqa maqanakuyta gustaq kani.

Allinta estudiaq kaptiymi tayta-mamay kallpanchawarqa universidadman rinaypaq. Chaypim cuentata qukururqani nacionniypi politicokunaqa mana allinkunata ruwasqankumanta. Chaymi autoridadkunapa contranpi hatarirqani. 20 watallaypiraq kachkaspaymi, huknin estudiaqmasiypiwan huk policiapa umanta pakirurqaniku armanta qichunaykupaq. Chaymi carcelman aparuwaspanku sentenciaruwarqaku baleasqa wañunaykupaq.

Carcelpi kachkaspaymi tantiarurqani baleawaptinku mana mancharikunaypaq nitaq waqanaypaq. Chaymantapas tukuypim yuyaymanayta qallaykurqani, piensarqanim imanasqa ñakarisqanchikpi chaynataq wañusqanchikpi.

BIBLIAM VIDAYTA CAMBIARURQA: Punchawkuna pasasqanman hinam juezqa niykuwarqaku manaña wañuchiwanankupaq, aswanqa 30 wata carcelpi kanaykupaq. Carcelpi kachkaspaymi Jehova Diospa testigonkunata riqsirurqani, paykunaqa Diospi iñisqankuraykum carcelasqa karqaku. Yanqamanta carcelasqa kaspankupas manam piñasqachu karqaku, aswanqa hawkallam. Chayna kasqankuwanmi anchata admirakurqani.

Jehova Diospa testigonkunam willawarqaku Diosqa kusisqa kawsakunanchikta munasqanmanta. Bibliawanmi yachachiwarqaku hamuq tiempopiqa allpa pachanchikta allichaptin chaypi manaña ñakarispa wiñaypaq kusisqa kawsakunanchikmanta (Salmos 37:29).

Bibliamanta yachachiwasqankuqa anchatam kusichiwarqa. Ichaqa piensarqanim: “Manachusmi imayna kayniytaqa cambiayta atisaqchu nitaq politicokunapa contranpi kaytapas saqiyta atisaqchu”, nispay. Chaymi tantiakururqani bibliata sapallayña leenaypaq. Biblia leeyta tukuruspaymi cuentata qukururqani Jehova Diospa testigonkunaqa Jesuspa yachachisqanman hina kawsakusqankumanta.

Bibliamanta yachasqaywanmi cuentata qukururqani imayna runa kayniyta, qacha simi kayniyta, cigarro pitayniyta chaynataq politico runakunawan chaqrukuyta saqinaymanta. Chaykunata saqiyqa sasam karqa, ichaqa Diospa yanapayninwanmi saqirurqani.

Genioyta cambianaypaqpas yanapawarqam Proverbios 16:32, chaypim nin: “Kallpasapa soldadomanta aswan allinqa anaq piñakuq runam. Llaqta venceq runamantapas aswan allinqa kikillan controlakuq runam”, nispa. Kunankamapas Jehova Diostam hinalla mañakuni genioyta controlanaypaq

1991 watapim Jehova Diospa testigonña kanaypaq cilindropi carcelpi bautizakururqani. Qatiqnin watapim wakiqniykuqa carcelmanta kacharisqa karqaniku Españaman rinaykupaq, chaypi aylluyku kasqankurayku. Españaman chayaruspayqa iñiqmasinchikkunawanmi huñunakuyta qallaykurqani, paykunaqa aylluypas kachkankuman hinam kuyakuywan chaskiykuwaspanku imapipas yanapaykuwarqaku.

KUSISQAÑAM KAWSAKUNI: Kunanqa ancha kusisqam Jehova Diosta servichkani warmichaypiwan chaynataq warmi churiykunapiwan. Chaymantapas astawanmi tiempochakuni bibliamanta hukkunaman yachachinaypaq. Wakinpiqa jovenllaraq kachkaspay, wañuypa patanpiña kasqayta yuyarispaymi anchata agradecekuni hinallaraq kawsakusqaymanta. Chaymantapas anchatam munachkani hamuq tiempopi manaña wañuspa wiñaypaq kay pachapi hawka kawsakuyta (Apocalipsis 21:3, 4).

[Willakuy]

“Kusikurqanim Jehova Diospa sutinta yacharuspay”

[Foto]

Anchatam qusaypiwan kusikuniku mana uyariy atiq runakunam Diosmanta yachachispayku