ACHKA runakunam ninku Diosta mañakuyqa mana imapipas yanapawasqanchikta. Bibliam ichaqa nin mana chayna kasqanta (Lucas 22:40; Santiago 5:13). Diosta mañakuyqa yanapawanchikmi Diosman asuykunapaq hinaspa kikinchikpas sanolla kanapaq, ¿imaynatam yanapawanchik?

Chaypaq kaypi piensarisun. Huk tayta imatapas churinman quspanqa, “gracias” ninanpaqmi yachachin, chaymi warmantaqa yanapanqa agradecekuq kananpaq. Chaynam ñuqanchikpas imayna tarikusqanchikta Jehova Diosman willakunanchik payta mañakuspanchik. Chayqa allinninchikpaqmi kanqa. Chaymantayá yachaykusun.

Diosta mañakusunchik agradecekunapaq. Tukuy ima chaskisqanchikmanta Diosta agradecekuyqa yanapawasunmi imapas mana kapuwaqninchikpi mana piensanapaq. Aswanmi yanapawasun agradecekuq runa kanapaq hinaspa kusisqa kawsakunapaq (Filipenses 4:6).

Jesuspas mañakuspanmi taytanta agradecekurqa uyariykusqanmanta (Juan 11:41).

Diosta mañakusunchik pampachaykuwananchikpaq. Imamantapas Dios pampachaykuwananchikpaq mañakusqanchikqa yanapawanchikmi hawkaña tarikunapaq, chaymantapas yanapawanchikmi imapas mana allin kaqtaqa kaqmanta manaña ruwanapaq hinaspa sunqumanta wanakunapaq.

Diosta serviq Davidpas huchallikuruspanmi pampachasqa kananpaq Diosta mañakurqa (Salmos 51). *

Diosta mañakusun paypa munasqanman hina kawsakunapaq hinaspa yachayta quwananchikpaq. Kayna mañakusqanchikqa yanapawanchikmi mana hatun tukuq kanapaq hinaspa mana kikinchikpi confiakuspa Jehova Diosllapi hapipakunapaq (Proverbios 3:5, 6).

Kamachiq Salomonpas Jehova Diostam mañakurqa paypa munasqanman hina kawsakunanpaq hinaspa Israel llaqtata yachaywan kamachinanpaq (1 Reyes 3:5-12).

Diosta mañakusun sasachakuypi tarikuspa. Ima llakipas qatiruwaptinchikqa Jehova Diosta mañakusqanchikmi sunqunchikta tiyaykachinqa. Chayta ruwaspam Jehova Diosllapi hapipakusqanchikta qawachisun (Salmos 62:8).

Asa sutiyuq kamachiqpas Jehova Diostam mañakurqa hatun sasachakuypi tarikuspan (2 Cronicas 14:11).

Diosta mañakusun runamasinchikkunapaq. Kayna mañakusqanchikqa yanapawasunmi mana kikillanchikpi piensaq kanapaq aswanmi yanapawasun sasachakuypi tarikuqkunatapas llakipayanapaq hinaspa kuyapayanapaq.

Jesuspas Jehova Diostam mañakurqa qatiqninkunapaq (Juan 17:9-17).

Mañakusqanchikpim Diosta hatunchananchik. Tukuy ima unanchasqanmanta Jehova Diosta mañakuspa hatunchaspanchikqa, paytam astawan kuyanchik hinaspapas payman astawan asuykunanchikpaqmi yanapawanchik.

Diosta serviq Davidpas mañakuspanmi tukuy ima unanchasqankunamanta Diosta hatuncharqa (Salmos 8).

Diosta mañakuyninchikqa yanapawasunchiktaqmi hawkalla tarikunanchikpaqpas. Bibliapim nin: “Diospa hawkayayninmi sunqunchiktawan yuyayninchikta [...] waqaychanqa”, nispa (Filipenses 4:7). Kayna sasallaña tiempopi hawka kawsakuyqa imamantapas aswan allinmi. Yanapawanchikmi sanolla kawsakunanchikpaqpas (Proverbios 14:30). Ichaqa, ¿imaynatam chayna hawka kawsakuyta atichwan? ¿Kikillanchikmanta atiruchwanchu icha imam yanapawachwan?