Diosta mañakuymanta: ¿Ima kaptintaq hinaspa maypitaq Diosta mañakunanchik?
ACHKA religionkunam tantiarunkuña maypi hinaspa imay hora Diosta mañakunankupaq. Chaymanta, ¿biblia imatapas ninchu?
Bibliaqa manam niwanchikchu imay hora Diosta mañakunapaqqa.Ichaqa willawanchikmi Jesus manaraq mikuykuchkaspan Diosta mañakusqanmanta (Lucas 22:17). Qatiqninkunapas Diosta manaraq yupaychayta qallaykuchkaspankum mañakurqaku. Ñawpaq tiempopi Judiokunapas Diosta yupaychanankupaq huñunakusqankupim Diosta mañakuqku. Diospas munarqam wasinqa ‘mañakuna wasi’ kananta (Marcos 11:17).
Jehova Diosqa anchatam kusikun serviqninkuna huñunakuykuspanku munasqanman hina huk sunqulla mañakuptinkuqa. Chayna mañakusqankuraykum wakinpiqa mañakusqankuman hina Jehova Diosqa imatapas ruwaykun (Hebreos 13:18, 19). Chaymi Jehova Diospa testigonkunapas sapa huñunakusqankupi mañakunku. Paykunapa imayna mañakusqankuta uyariykuyta munaspaqa riwaqmi huñunakuyninkuman.
Bibliaqa manam niwanchikchu imay hora utaq maypi Diosta mañakunapaqqa. Ichaqa willawanchikmi Diosta serviqkuna imay horapas utaq maypipas mañakusqankuta. Jesuspas nirqam: “Diosta mañakunaykipaqqa cuartoykiman yaykuy, hinaspayá punkuta wichqaykuspa mana rikuy atinapi kaq taytaykita mañakuy. Hinaptinmi mana rikuy atinamanta qawamuq taytayki pagapusunki”, nispa (Mateo 6:6).
Jehova Diostaqa mañakuchwanmi imay horatapas hinaspa maypiña-chaypiña kaspapas.
Anchatamá kusikunchik tukuy atiyniyuq Diosman asuykuyta atispanchik. Payqa uyariykuwanchikmi imay horaña utaq maypiña-chaypiña mañakuptinchikpas, Chaymi Jesuspas tiempochakurqa Diosta mañakunanpaq. Huk kutipim tukuy tuta Diosta mañakurqa allinta tantiaysiykunanpaq (Lucas 6:12, 13).
Bibliapiqa willawanchiktaqmi Diosman sunqu achka qarikuna, warmikuna allinta tantianankupaq hinaspa sasachakuypi tarikuspanku Diosta mañakusqankumanta. Wakinkum mañakuqku sunqullankupi, wakinkum rimarispanku, wakinkum sapallanku, wakinkuñataqmi huñunasqa. Ichaqa imaynatapas Jehova Diostam mañakurqaku. Jehova Diospas kallpanchawanchikmi tukuy tiempo mañakunanchikpaq (1 Tesalonicenses 5:17). Mayna kusikunapaqmi Diospa kayna kallpanchawasqanchikqa. Jehova Diosqa uyariykuwasunmi hayka kutikama mañakuptinchikpas.
Kay tiemponchikpi wakin runakunaqa hinallam ninku Diosta mañakuyqa yanqapaq kasqanta. ¿Qampas chaynatachu piensanki? Qatiqninpim chaymanta astawan yachaykuchkasunchik.
Kaykunatapas leeykuy
Diosta mañakuymanta: ¿Diosta mañakuyqa yanapawanchikchu?
Diosta mañakuyqa yanapawanchikmi Diosman asuykunapaq hinaspa kikinchikpas sanolla kanapaq.