LLAPA ima allin kaqkunataqa Diosmantam chaskinchik. Paymi Intita unancharqa punchawpi achkinanpaq, hinaspa Killatawan lucerokunata tutapi achkirinanpaq. Allpatapas unancharqam chaypi kawsananchikpaq.

Diosqa manam puntataqa Intita, Killata, lucerokunata nitaq Allpatapas unancharqachu. ¿Yachankichu imatam unancharqa? Pay hina espiritukunatam. Diostaqa manam rikuyta atinchikchu, chaynallataq paykunatapas manam rikuchwanchu. Bibliaqa kay espiritukunata angelkuna nispam sutichan. Diosmi angelkunata unancharqa hanaq pachapi paywan yachanankupaq.

Diospa punta kaq angel unanchasqanqa manam wakin angelkuna hinachu karqa. Diospa piwi Churinmi karqa, paymi Taytanwan llamkarqa. Paymi Diosta llapa imatapas rurasqanpi yanaparqa. Intita, Killata, lucerokunata hinaspa Allpanchikta ruraypim yanaparqa.

Chay tiempopiqa, ¿imaynataq Allpaqa karqa? Qallariypiqa manam imapas karqachu. Enteron allpataqa yakullam pampachkarqa. Diosmi munarqa Allpapi runakuna kawsananta. Chaymi, ñoqanchikpaq allicharurqa. ¿Imatam rurarqa?

Allpataqa achkichinanraqmi karqa. Chaymi Diosqa Intipa kanchayninwan Allpataqa achkichirqa. Chaynatam rurarqa tuta-punchaw kananpaq. Chaymantam yakukunata huk hawaqllaman huñuruspan chaki allpata rikurichirqa.

Manaraqmi imapas kasqachu allpapiqa. Kay qawasqayki dibujomanmi rikchakurqa. Manam waytakunapas, sachakunapas nitaq animalkunapas karqaraqchu. Lamar qochapipas challwakunaqa manaraq karqachu. Diosqa manaraqmi tukusqachu runakunapaq hinaspa animalkunapaq rurasqanta.