NOEYPAQA karqa warmin hinaspa kimsa churinkunapas. Churinkunaqa karqa Sem, Cam hinaspa Jafet. Paykunapas warmintin karqaku. Chaymi Noeypa ayllunpiqa pusaq runakuna karqaku.

Diosmi Noeyta rurachirqa mana haykapipas rurasqanta. Hatun buquetam ruranki, nispam nirqa. Chay buqueqa hatu-hatunmi kasqa. Diosmi nirqa: ‘Iskay altosniyoqta ruranki, cuartokunatapas rurankitaqmi’ nispa. Cuartokunaqa Noeypaq, ayllunpaq hinaspa animalkunapaq karqa chaymanta mikuykunata waqaychanankupaqpas.

Diosmi Noeyta kamachirqa buqueta yaku mana yaykunanpaq hina rurananpaq. ‘Ñoqam kacharimusaq sinchi parata kay pachapi kawsaqkunata puchukachinaypaq. Buquepi mana kaqkunaqa wañunqakum’ nispam nirqa.

Noeywan churinkunaqa Diosta kasukuspankum buque rurayta qallarirqaku. Wakin runakunañataqmi mana allinllataña ruraspanku Noeypa rurasqanmanta asikurqaku. Diospa rurananmanta Noey willakusqantaqa manam pipas creerqachu.

Hatun kaptinmi unay watapi buquetaqa rurarqaku. Achka wata pasaruptinñam ruraytapas tukururqaku. Chaymi Noeyta Dios nirqa llapallan animalkunata buqueman yaykuchinanpaq. Wakin animalkunamanta orqontin-chinantinta yaykuchinanpaq, nirqa. Wakinmantañataqmi Diosqa nirqa qanchis pares orqontin-chinantinta yaykuchinanpaq. Chaymanta alton pawaqkunatapas yaykuchinanpaqmi nirqa. Noeymi lliwta rurarqa Diospa kamachisqanman hina.

Chaymantam, Noeyqa aylluntin buqueman yaykurqaku. Hinaptinmi Diosqa punkuta wichqarurqa. Buquepa ukunpiñam Noeyqa ayllunwan suyarqaku. Qampas paykunawan chaypi kawaq karqa. Diospa nisqanman hina, ¿chayamunmanchu karqa sinchi paraqa?