¿YACHANKICHU imatam Noeyqa rurarqa buquemanta aylluntin chayllaraq lloqsimuspanku? Regalotam Diosman qorqa. Uray kaq dibujopi chaynatam rurachkan. Sinchi Paramanta ayllunta Dios salvaykusqanmantam Noeyqa agradecekunanpaq animalkunamanta ofrendata qorqa.

¿Chaskirqachu Jehová Diosqa Noeypa ofrecesqanta? Chaskirqam. Chaymi Diosqa Noeyta prometerqa manaña sinchi parawan kay pachata puchukachinanpaq.

Allpaqa chayllam chakirurqa, chaymi Noeywan ayllunqa buquemanta lloqsiruspanku hinalla allpapi kawsakurqaku. Diosmi bendecispan nirqa: ‘Achka wawa-churiyoqyá kaychik. Miranaykichikmi kay Pachata huntanaykichikkama’ nispa.

Tiempopa risqanman hina sinchi paramanta runakuna uyarispankuqa mancharikunmankuch, kaqllamanta sinchi parawan runakunata Dios puchukachinanmanta. Chaymi Dios señalta qorqa runakunata yuyarichinanpaq Prometesqanman hina manaña yakuwan Allpata pampaykunanpaq. ¿Yachankichu imatam qorqa chayta yuyarichinanpaq? Chirapatayá.

Para usyayta Inti kanchaykamuptinmi chirapaqa cielopi rikurin. Sumaqllaña achka colorniyoqmi chirapaqa. ¿Hukllatapas rikurqankichu? ¿Qawachkankichu dibujopi kaqta?

Kaynatam Dios nirqa: ‘Manañam sinchi parawanqa wañuchisaqñachu runakunata nitaq animalkunatapas. Chirapaytam churani puyupi. Puyupi chirapa rikurimuptinmi chayta qawaspay yuyarisaq wiñaypaq contrato rurasqayta’ nispa.

Chirapata qawarispaykiqa, ¿imatam yuyarinayki? Diospa prometesqanta, payqa manañam sinchi parawanqa kay pachata puchukachinqañachu.