TIEMPOPA risqanman hina Noeypa churinkunaqa achka churiyoqkunaña karqaku. Paykunapa churinkunapas wiñaruspankuqa churiyoqñam karqaku. Chayllam runakunaqa Allpaman huntarurqaku.

Nimrod sutiyoq runam Noeypa willka churin karqa. Chay runaqa animalkunata hinaspa runakunatapas hapiruspanmi yaqa imatapas hina wañuchiq karqa. Nimrodmi kikillanmanta kamachikuq rikurirurqa runakunata kamachinanpaq. Nimrodqa manam Diosmanqa agradarqachu.

Chaypiqa lliw runakunam karqaku huk rimayniyoqlla. Nimrodqa runakunatam payllapaqña huñulla kanankuta munarqa kamachinanpaq. Chaynaqa, ¿yachankichu ima rurasqanta? Paykunatam nirqa, llaqtata hatarichinankupaq hinaspa cielokama haypaq torretapas perqamunankupaq. Qaway dibujopim ladrillokunata rurachkanku.

Chay torre rurasqankutaqa manam Jehová Diosqa allintachu qawarqa. Payqa munarqam runakuna chay llaqtamanta pasakuspa enteron Allpapi kawsakunankuta. Paykunam ichaqa ninakurqaku: ‘¡Hakuchik! Hatarichisunchik llaqtata, perqasuntaqyá cielokama haypaq torretapas. ¡Ancha reqsisqam kasunchik!’ nispa. Kikillanku alabakuytam munarqaku manam Diostachu.

Chaymi Diosqa hatarichisqanku torre ruranankuta saqerachirqa. ¿Yachankichu imaynatam chayta rurarqa? Diosmi kay pachapi runakunapa rimayninta qonqayllamanta pantarachirqa. Chaymi mayqanninkupas rimasqankuta manaña entiendenakurqakuchu. Chayraykum llaqtankutaqa Babel otaq Babilonia nispa suticharqaku, chayqa “Pantachiy” ninanmi.

Chaymi Babelmanta runakunaqa ripukurqaku. Huk rimaylla rimaqpuram huñunakuruspanku huklawmanña ripukurqaku kawsakunankupaq.