KAY qawasqayki dibujopiqa obligaspam runakunata llamkachichkanku. ¡Qaway, chay runaqa llamkaqta azotewan azotechkan! Jacobpa mirayninmi llamkaqkunaqa karqaku, paykunataqa Israel runakuna nispam suticharqaku. Llamkanankupaq obligaqkunañataqmi Egipto runakuna. Hinaspa Israel runakunatam sirvientenpaqña hapirunku. ¿Imaynataq chayqa pasarqa?

Achka watakunam Egiptopi Jacobpa mirayninkunaqa hawkalla kawsakurqaku. Joseymi Egipto nacionpi ancha reqsisqa runa kaspa paykunataqa yanaparqa, paymantaqa Faraonllam tumpa masqa karqa. Chaymantam Joseyqa wañukurqa. Hinaptinmi Israel runakunata cheqniq Faraonña Egipto nacionpi kamachikurqa.

Chaymi kay cheqnikuq Faraonqa Israel runakunata sirvientepaqña hapirurqa. Hinaspanmi mana kuyapayakuq capatazkunapa makinpim entregaykurqa. Paykunam Israel runakunata obligarqaku sinchillataña llamkaspa Faraonpaq llaqtakunata hatarichinankupaq. Israel runakunam ichaqa aswanraq mirarurqaku. Chaymantam Egipto runakunaqa mancharisqallaña karqaku Israel runakuna llumpayllataña achkayarunankumanta hinaspa aswan atiyniyoq kanankumantapas.

¿Yachankichu Faraonpa rurasqanta? Israel casta wachakuq warmikuna wachakuchkaptinku yanapaq parterakunata kamachirqa: ‘Qari wawachakuna naceqtaqa wañuchinkichikmi’ nispa. Kay warmikunam ichaqa allin ruraq kaspanku wawachakunataqa manam wañuchirqakuchu.

Chaymi Faraon kamachirqa lliw runankunata: ‘Llapallan Israel qari wawachakuna naceqtaqa wañuchiychik. Warmi wawachakunatam ichaqa ama imanankichikchu’ nispa. ¿Manachu llakikunapaq kanman chaynata ruranankupaq kamachimuptinkuqa? Yachasunchik imaynatam qari wawachata salvasqankumanta.