LOTQA aylluntinmi yacharqaku Abrahanwan kuska Canaan llaqtapi. Lottam Abrahan nirqa: ‘Allpaqa manam animalninchikkunapaq haypanñachu. Ruegakuykim rakinakunanchikpaq. Maylawmanpas riptikiqa ñoqaqa huklawmanmi risaq’ nispa.

Lotmi allpata qawarqa. Hinaspa rikururqa enteron Jordan mayupa qechwanta, rikurqataqmi chay sitiopiqa yakuqa hinaspa pastoqa sumaqllaña animalkunapaq kasqanta. Chaymi Lotqa pasakurqa qawarisqan sitioman llapallan familianwan animalnintin. Chaymantañam wasinkuta rurarqaku Sodoma llaqtapi.

Sodomapi kaq runakunaqa llumpa-llumpay mana allin runakunam karqaku. Chaywanmi, Lotqa allin runa kaspa llakikurqa. Diospas llakikurqam. Chaymi Diosqa iskay angelninkunata kachamurqa Lotman willanankupaq Sodoma hinaspa Gomorra llaqtakunapi mana allin ruraq runakuna puchukanankumanta.

Chay angelkunam Lotta nirqaku: ‘¡Apurawman! Lloqsispayki warmikita pusay, kaypi kaq iskaynin warmi churikikunatawan!’ nispa. Lotwan familian mana apurawman lloqsiptinmi angelkunaña makinkumanta aysarqaku llaqtapa hawa lawninman. Chaymi huknin angel nirqa: ‘¡Vidaykichikrayku lluptiychik! Amam qepata qawarikamunkichikchu. Lluptiychik orqoman ama puchukanaykichikpaq’ nispa.

Lotqa warmi churinkunawan kasukuspanku Sodoma llaqtamanta lluptirqaku. Manam sayayllapas sayaykurqakuchu, manataqmi qepankutapas qawarqakuchu. Lotpa warminmi ichaqa mana kasukurqachu. Sodoma llaqtamanta karupiña kachkaptinkum, sayaykuspa qepaman qawarirurqa. Hinaptinmi Lotpa warminqa suytu kachiman tikrakururqa. ¿Dibujopi qawachkankichu?

Kaymantaqa yachachwanmi: Kasukuqkunataqa Diosqa salvanmi, mana kasukuqkunam ichaqa puchukanku.