¿YAQACHU imatapas prometekurqanki hinaspa prometekusqaykiman hina rurayqa sasachu karqa? Kay dibujopi qawasqayki runata chaynam pasarqa, chaymi llakisqa kachkan. Payqa Jeftey sutiyoq Israel nacionpi juezmi karqa.

Jefteyqa kawsarqa Israel runakuna Jehová Diosta qepancharusqanku tiempopi. Yapatawanmi mana allinkunata rurachkanku. Hinaptinmi Jehová Diosqa Amonpa mirayninkuna ñakarichinanpaq qoykurqa. Chaymi Jehová Diosta Israelpa mirayninkuna qayakurqaku: ‘Qampa contraykipim huchallikuruniku. ¡Libraykuwaykuyá!’ nispa.

Runakunaqa pesapakurqaku mana allin kaqkunata rurasqankumanta. Mana allin rurasqankuta saqeruspanku Jehová Diostaña adorarqaku. Chaymi Jehová Diosqa yapatawan paykunata yanaparqa.

Israelpa mirayninqa Jeftey sutiyoq runata akllarqaku Amon casta runakunapa contranpi peleananpaq. Chaymi Jefteyñataq Jehová Diospa yanapakuyninta munan. Hinaspanmi Jehová Diosta prometekurqa: ‘Sichum Amonpa mirayninkunata makiyman churaykuptikiqa vencesqaymanta kutimuptiy tupanaypaq wasiymanta lloqsimuqmi qampaq kanqa’ nispa.

Jehová Diosmi Jefteypa mañakusqanta allinpaq hapispan makinman enemigonkunata churaykurqa. Vencesqanmanta Jeftey wasinman kutimuptin, ¿yachankichu pitaq wasinmanta lloqsiramurqa payta chaskiykunanpaq? Chullachalla warmi churinmi. ‘¡Ay churilláy! Hatun llakimanmi churaruwanki, Jehová Diosmanmi prometekurqani, chay prometekusqaytaqa cumplisaqchá’ nispam Jefteyqa waqarqa.

Jefteypa prometakusqanta warmi churin yacharuspanmi paypas llakikururqa, taytantawan chaynataq amigonkunatapas saqerunanmanta. Ichaqa Jehová Diospa karpanpi Silo llaqtapi servinqa wañukunankama. Hinaptinmi taytan Jefteyta nirqa: ‘Taytay, sichu Jehová Diosman prometekuspaqa ruray prometekusqaykiman hina’ nispa.

Hinaptinmi Jefteypa warmi churinqa Silo llaqtaman rirqa, hinaspam Jehová Diospa karpanpi wañunankama servirqa. Israel nacionpi sipaskuna watan-watan payta watukuq riqku tawa punchaw kuska kanankupaq. Llapallan runakunaqa Jefteypa warmi churintaqa kuyarqakum Jehová Diosta allinta serviq kaptin.