¿QAWACHKANKICHU kay dibujopi ima pasasqanta? Paykunaqa Israel castapa soldadonkunam. Qonqorakuykuspam wakinqa yakuta tomachkanku. Jefenku Gedeonmi hichpallankupi sayachkan. Payqa qawachkanmi imaynatam yakuta tomasqankuta.

Musyariy imaynatam sapakamaqa yakuta tomachkanku. Wakinkuqa qonqorakuykuspa yakuta tomachkanku. Hukninñataq makinwan hoqarispa yakuta tomachkan muyuriqninpi imapas pasasqanta musyakunanpaq. Kayna rurayqa allinmi, Jehová Diosmi Gedeonta nirqa qawan-qawanlla yaku tomaqkunallata akllananpaq. Wakinñataqmi wasinman kutikunanku karqa. Yachasunchikyá imanasqataq chaynaqa karqa.

Kaqllamantam Israel runakunaqa sasachakuypi tarikuchkanku Jehová Diosta mana kasukusqankumanta. Madian casta runakunaqa sinchi atiyniyoq karuspankum Israel runakunata ñakarichinku. Hinaptinmi Israel runakunaqa Jehová Diospa yanapakuyninta mañakurqaku, chaymi Jehová Diosqa yanaparqa.

Hinaspam Jehová Diosqa Gedeonta nirqa tropakunata huñunanpaq, Gedeonñataqmi 32.000 soldadokunata huñurqa. Israel runakunapa enemigonkunañataqmi 135.000 soldadokuna karqaku. Jehová Diosmi ichaqa Gedeonta nirqa: ‘Qanwan kaq runakunam achkallaña kachkan’ nispa. ¿Imanasqataq chaynataqa nirqa?

Israel runakuna venceruspankuqa, kikillankumanta vencesqankuta piensarunmanku karqa chaynallataq Jehová Diospa mana yanapasqallanwan vencerunankutapas. Chaymi Jehová Diosqa Gedeonta nirqa: ‘Pipas manchakuqqa wasinmanyá kutikuchun’ nispa. Chaynata niruptinmi 22.000 soldadokuna kutikurqaku. Chaymi 10.000 runakunallañam qeparurqaku 135.000 soldadokunawan peleanankupaq.

Ichaqa, ¡musyariy! Jehová Diosqa nirqa: ‘Runaykikunaqa achkaraqmi’ nispa. Chaymi Gedeonta nirqa soldadonkuna chay mayumanta yakuta tomanankupaq hinaspa qonqorakuykuspa yaku tomaqkunata wasinkuman kutichinanpaq. Jehová Dios nirqa: ‘Kay 300 yakuta tomaspa qawan-qawanlla kaq qarikunawanmi enemigoykikunata vencerunki’ nispa.

Peleanankupaqña kachkaptinku Gedeonqa 300 soldadonkunata kimsaman rakirurqa. Hinaspa sapakamaman cornetata qorqa, qoykarirqataqmi ukunpi ratachkaq mecheroyoq puyñukunatapas. Yaqa chawpi tutataña Gedeonpa soldadonkunaqa Madian casta runakunapa muyuriqninpi sayaspanku cornetankuta tocarqaku, sapakamam pakirqaku puyñu apasqankutapas hinaspam qaparirqaku: ‘¡Jehová Diosrayku hinaspa Gedeonraykum peleaniku!’ nispa. Enemigonkuna rikchariruspanmi mancharikuspanku kikinkupurapas wañuchinakurqaku. Chaymi enemigonkuna lluptirqaku hinaptin Israel runakunaqa vencerqaku.