JOSUEYTA qaway. Paymi nichkan: ‘¡Yaw Inti, sayaykuy!’ nispa. Intitaqmi sayarurqa. Hinaptinmi sayaruspan huk punchawpuni mana seqaykurqachu. ¡Jehová Diosmi chaytaqa rurarqa! Qawasunchikyá imanasqataq Josueyqa Inti hinalla kanchamunanta munan.

Canaan llaqtakunamanta pichqa reykuna Gabaon llaqtapa contranpi peleachkaptinku, Gabaonpi yachaqkunaqa Josueypa yanapakuyninta mañakurqaku kaynata nistin: ‘¡Chaylla pasamuy! ¡Hinaspaykiyá salvaykuwayku! Orqo lawpi yachaq runakunapa llapallan reyninkum ñoqayku serviqnikikunapa contraykupi peleachkanku’ nispa.

Chayllam Josueyqa llapallan soldadonkunapiwan Gabaon llaqtaman tukuy tuta rirqaku. Chayaruptinku pichqa reykunapa soldadonkunaqa manchakuspa lluptirqaku. Hinaptinmi Jehová Diosqa cielomanta hatun rumikuna hina runtu parata chayachimurqa, Josueypa soldadonkuna wañuchisqakumantaqa astawanmi runtu paraqa runakunata wañuchirqa.

Hinaptinmi Josueyqa musyarurqa Inti seqaykunanmanta. Tutayaruptinmi, pichqa mana allin reykunapa soldadonkunaqa lluptikurunqaku. Chaymi Josueyqa Jehová Diosta mañakuruspa nirqa: ‘¡Yaw Inti, sayaykuy!’ nispa. Inti hinalla achkiriptinmi, Israel runakunaqa enemigonkunata vencerurqaku.

Canaan lawpiqa kachkanraqmi achka reykuna Jehová Diospa llaqtanta cheqniq. Chaymi Josueywan tropankunaqa soqta watapi Canaan lawpi 31 reykunata vencerurqaku. Chayta ruraruspanña, Josueyqa allpataqa partiykurqa Israel casta sapa ayllukunaman tupasqanman hina.

Achka wata qepatañam Josueyqa 110 watanpi wañukurqa. Runakunaqa Jehová Diosta kasukurqaku Josuey chaynataq ancianomasinkuna kawsanankamapas. Wañukuptinkuñataqmi runakunaqa mana allinta ruraspanku sasachakurqaku. Hinaptinmi chayraq Diospa yanapakuynintapas maskarqaku.