KAY qarikunaqa sasachakuypim tarikunku. Mana wañunankupaqqa pasakunankum. Paykunaqa Israel castamanta wateqaqkunam kanku, yanapaqninñataqmi Rahab sutiyoq warmi. Paypa wasinqa karqa Jerico llaqtapa murallankunapa hawanpi. Yachasunchik imaynam kayqa karqa.

Israel runakunaqa Canaan allpaman yaykunankupaqmi Jordan mayuta chimpanqakuña. Manaraq yaykuchkaptinku Josuey kacharqa iskay wateqaqkunata. Paykunatam nirqa: ‘Qawamuychikyá allpatawan Jerico llaqtata’ nispa.

Jerico llaqtaman wateqaqkuna yaykuruspanku Rahab sutiyoq warmipa wasinpi samarurqaku. Ichaqa Jerico llaqtapi reymanmi willaykamurqaku: ‘Israelpa mirayninkunamantam runakuna chisi hamurunku allpanchik wateqaq’ nispa. Chayta uyariruspanmi Rahab sutiyoq warmiman rey kachaspan nichimurqa: ‘¡Wasikiman yaykumuq runakunata hawaman horqomuy!’ nispa. Rahabmi ichaqa chay runakunata wasinpa qatanpi pakaruspan nirqa: ‘Runakunam ñoqaman hamurqa ichaqa manam yachanichu maylawmantam kasqankuta. Tutaykuchkaptinñam llaqtapa zaguanninta wichqanankupaq kachkaptin lloqsirurqaku. ¡Apurawman kallpaychik hayparunkichikmi!’ nispa. Hinaptinmi chay runakunaqa maskastin qatiparqaku.

Chay runakuna pasakuptinmi, Rahabqa wasinpa qatanman seqaruspa wateqaqkunaman nirqa: ‘Yachanim Jehová Dios kay allpa qosunaykichikta. Uyarirqanikum Egipto nacionmanta lloqsimuptikichik Puka lamar qochata chakirachisqanta. Uyarirqanikutaqmi rey Sehontawan rey Ogta wañuchisqaykichiktapas. Imaynam ñoqapas qamkunata llakipayarirqaykichik, juramentaykuwaychik ñoqamanta llakipayarikunaykichikta, chaynataq tayta-mamaytapas turiykunatapas hinaspa ñañaykunatapas libraykunaykichikpaq’ nispa.

Wateqaqkunam chaynata ruranankupaq prometekurqaku, Rahabtam ichaqa kaynata rurananpaqmi nirqaku: ‘Kay guindo waskatam warkunki ventanaykipi, hinaspam wasikiman huñunki llapallan aylluykikunata. Chaynaqa ñoqayku kay Jerico allpaman yaykumuptiyku kay guindo waskata qawaspayku wasikipi kaqkunata mana wañuchisaqkuchu’ nispa. Wateqaqkuna Josueypa kasqanman kutispanku tukuy ima paykunawan pasasqanta willakurqaku.