¿YACHANKICHU imataq sinchillaña kallpayoq runapa sutinqa karqa? Sanson. Payqa Israel nacionpi jefem karqa. Paytaqa Jehová Diosmi kallpancharqa. Manaraq nacechkaptinmi, Jehová Diosqa Sansonpa mamanta nirqa: ‘Wiksayakuspaykim qari wawata wachakunki. Paymi qallarinqa Filistea casta runakunamanta Israel nacion librayta’ nispa.

Filistea casta runakunaqa Canaan lawpi yachaq mana allin ruraq runakunam karqaku. Soldadonkupas achkallañam karqa, chaymi Israel runakunata ñakarichiqku. Filistea casta runakunapa yachasqan lawman Sanson richkaptinmi malta leon Sansonman pawaykurqa qaparkachastin. Payñataqmi leonta mana imallawan wañurachirqa. Chaymanta wañurachirqa pachaknintin Filistea runakunatapas.

Chaymantam Sansonqa Dalila sutiyoq warmita kuyarurqa. Filistea runakunapa kamachiqninkuna Dalilaman 1.100 qollqeta sapakama qonankupaq tanteakurqaku imapim Sansonpa sinchi kallpan kasqanmanta paykunaman willakuptinqa. Dalilañataq qollqeta munapayarqa. Chaymi Sansonta chaynataq Diospa llaqtantapas mana kuyaspan, Sansontaqa tapupayarqa imapim sinchi kallpan kasqanmanta willachikunanpaq.

Tapupayaspanñataqmi Dalilaqa Sansonpa secretonta willachikurqa. ‘Manam haykapipas chukchaytaqa rutuwarqakuchu. Ñoqaqa mamaypa wiksanmantapunim Diospaq rakisqa kani. Sichu chukchayta ruturuwaptinkuqa kallpaymi ñoqamanta chinkarunman’ nispam Sansonqa nirqa.

Chayta Dalila yacharuspanñataqmi moqonkunapa hawanpi Sansonta puñurachirqa. Hinaspanmi huk runata qayaykuspan chukchanta kachiy-kachiyta ruturachirqa. Puñusqanmanta Sanson rikchariruptinmi kallpanqa chinkarusqa. Hinaptinmi Filistea runakuna Sansonta hapiruspankum ñawinkunata horqorurqaku hinaspa sirvientenkupaqña churarqaku.

Chaymanta Filistea runakunaqa huñunakururqaku Dagon sutiyoq taytachankuta adoranankupaq, hinaspanmi Sansonta carcelmanta pusachimurqaku paykunapa qayllanpi asichiqninku kananpaq. Chaykamaqa Sansonpa rutusqa chukchanqa kasqallan wiñarusqaña. Chaymi aysaqnin warmata Sansonqa nirqa: ‘Llapchaykachiway templo takyachiq pilarkunata’ nispa. Hinaptinmi Jehová Diosta Sansonqa mañakurqa kallpanchaykunanpaq chaymanta pilarninkunaman hapipakuykuspan tanqaspan nirqa: ‘Wañusaqyá Filistea runakunawan kuska’ nispa. Chaypim kachkarqaku 3.000 Filistea runakuna taytachankuta yupaychaspanku, hinaspam Sansonqa llapallan kallpanwan templo takyachiq pilarkunata tanqarqa hinaptinmi templo wichiykuspa llapallan chay mana allin runakunata wañurachirqa.