JERUSALEN llaqtapi David kamachikuchkaptinmi Jehová Diosqa Davidpa tropankunata yanaparqa enemigonkunata vencenanpaq. Canaan allpata Israel runakunaman qonanpaqmi Jehová Diosqa prometerqa. Hinaptin Jehová Dios yanapaptinmi tukuy chay allpakunata dueñochakurqaku.

Davidqa allin kamachikuqmi karqa. Payqa Jehová Diostaqa kuyanmi. Chaymi Jerusalenman yaykuruspan Jehová Diospa contrato baulninta chay llaqtaman aparqa. Davidqa templotam hatarichiyta munan chaypi Diospa baulninta churananpaq.

Chay watakunallapim Davidqa huchallikururqa. Payqa yacharqam hukpa kapuqninta hapikuruyqa mana allin kasqanta. Ichaqa Davidmi tarden law palacionpa qatanpi kachkaspan buenamozallaña warmita rikururqa. Payqa Betsabey sutiyoq warmim, qosanñataqmi Urias sutiyoq Davidpa soldadon karqa.

Davidqa Betsabeyta munapayaruspanmi palacionman pusarachimurqa. Betsabeypa qosanñataqmi Israel runakunapa enemigonkunawan peleachkarqa. Hinaptinmi Davidqa Betsabeywan puñururqa, chaymantam yacharurqa wiksayakurusqanta. Chaymi Davidqa mancharikurqa hinaspa tropakunapa jefen Joabwan llumpay peleaq tropakunapa puntanman Uriastaqa churarachirqa chaynapi wañunanpaq. Urias wañuruptinmi Davidqa Betsabeywan casarakurqa.

Jehová Diosmi Davidpaq llumpayllataña piñakururqa. Hinaspanmi Natanta kacharqa Davidman huchachananpaq. Dibujopim Natanpas chaynataq Davidpas kachkan. Davidqa huchapakusqanmanta pesakuspa wanakuptinmi Jehová Diosqa mana wañuchirqachu. Hinaspam Jehová Diosqa nirqa: ‘Chay mana allinkunata rurasqaykimanta desgraciatam kikikipa familiallaykimanta apamusaq’ nispa. ¡Mayna sasachakuykunaraq Davidpaqqa karqa!

Puntataqa, Betsabeypa wawan wañururqa, chaymantam Davidpa mayor kaq churin Amnon panin Tamarta abusarurqa. Chayta rurasqanmantam Davidpa churin Absalonqa Amnonta wañurachirqa. Chaymantañataq Absalonqa achka runakunawan kuyarachikuspa kikillanmanta reypaqña hatarikurqa. Hinaptinmi Davidpa runankuna Absalonpa runankunata vencerurqaku hinaspa Absalontapas wañurachirqaku. Cheqaptamá Davidqa sasachakuykunawan ñakarirqa.

Chayna sasachakuykuna kachkaptinmi Betsabeyqa Salomon sutiyoq Davidpa churinta wachakurqa. Chaymanta David machuyaruspa onqochkaptinmi churin Adoniasqa kikillanmanta reypaqña hatarirurqa. Hinaptinmi Davidqa Salomonpa umanman Sadoc sutiyoq sacerdotewan aceiteta tallichirqa reypaq churarusqanta qawachinanpaq. Chaymantañam Davidqa wañukurqa 70 watanpi. 40 watatam kamachikamurqa. Hinaptinmi Salomonña reyqa karqa.