YAKU ukupi runata qaway. Allinchuqaya, ¿aw? ¡Chay hatun challwam millpuramunqa! ¿Yachankichu pitaq chay runaqa? Jonasmi sutinqa. Qawasunchikyá imanasqataq chay llakipi kachkan.

Jonasqa Jehová Diospa willakuqninmi. Willakuq Eliseopa wañukusqan qepallata Jehová Diosqa Jonasta nirqa: ‘Ninive sutiyoq hatun llaqtaman rispayá chaypi yachaqkunapa contranpi willakamuy. Paykunapa mana allin rurasqankuqa castiganapaq hinaña kasqantam qawachkani’ nispa.

Jonasmi ichaqa mana munarqachu riyta. Aswanqa huklawman riq buquemanmi yaykururqa. Jehová Diosqa manam allinpaqchu Jonaspa ayqekusqanta qawarqa. Chaymi llumpa-llumpay wayra-parata hatarirachirqa. Buquepas yaku ukuman chinkaykunanpaq hinaña kachkarqa. Hinaptinmi buquepi llamkaqkunapas mancharisqallaña kaspanku diosninkuman sapakama qaparirqaku libraykunanpaq.

Hinaptinmi Jonasñataq nirqa: ‘Ñoqaqa Jehová Diosta yupaychaqmi kani Payqariki cielotapas hinaspa Allpatapas unanchaqmi. Jehová Diosta mana kasukuspaymi ayqechkani’ nispa. Hinaptinmi buquepi llamkaqkunaqa tapurqaku: ‘¿Imatataq qanwanqa rurasaqku lamar qocha hawkayaykunanpaq?’ nispa.

Chaymi Jonasñataq nirqa: ‘Lamar qochamanyá wischuykuwaychik hinaptinqa lamar qochaqa hawkayarunqañam’ nispa. Buquepi llamkaqkunaqa manam wischuyta munarqakuchu, ichaqa astawanña llumpay wayra-para hoqarikamuptinmi Jonasta hoqariruspa lamar qochaman wischuykurqaku. Chayraqmi lamar qochaqa hoqarikusqanmanta hawkayarurqa.

Hinaptinmi lamar qochapi Jonas chinkaykuchkaptin hatun challwa millpururqa. Jonasñataqmi mana wañurqachu. Hinaptin Jonasqa kimsa punchaw hinaspa kimsa tutan challwapa ukunpi karqa. Chaypim Jonasqa pesapakurqa Jehová Diospa kamachisqanman hina Ninive llaqtaman rinan kachkaptin mana kasukusqanmanta. Chaynaqa, ¿yachankichu imatam rurarqa?

Chaymantam Jonasqa Jehová Diospa yanapakuyninta mañakurqa. Chaymi Jehová Diosqa challwata kamachirqa lamar qochapa patanman Jonasta wischurunanpaq. Hinaptinmi Jonasqa Ninive llaqtaman pasarqa. ¿Manachu kay willakuyqa yachachiwanchik Jehová Diospa imapas kamachiwasqanchiktaqa kasukunanchikpaq?