¡QAWAY! Samuelqa chay runapa umanman aceiteta tallichkan. Chaynatamá rurarqaku rey kananpaq Diospa akllasqantaqa. Jehová Diosmi Samuelta nirqa Saulpa umanman aceiteta tallinanpaq. Chay aceiteqa miskillaña asnariqmi.

Rey kananpaq manaraq allin kasqanta Saulqa tanteakuspan Samuelta nirqa: ‘Ñoqaqa kani Benjaminpa ayllumantam, aylluyqa Israel wakin ayllukunamantapas aslla kaqmi. ¿Imanasqataq rey kanaypaqqa niwachkanki?’, nispa. Jehová Diosqa allinpaqmi Saulta qawarqa mana hatunchakuq kaptin. Chaymi rey kananpaq akllarqa.

Saulqa manam wakcha runachu nitaq taksallachu karqa. Paypa familianqa tukuy kapuqniyoqmi karqa, hinaspa Saulqa hatun sayayniyoq buenmozom karqa. ¡Israel runakunaqa hombronkamallam haypaq karqaku! Saulqa allinta kallpaq chaynataq kallpasapapas karqa. Israel nacionpi reyninku Saul kananpaq Jehová Diospa akllasqanmanta runakunaqa kusikurqaku. Chaymi llapallanku qaparirqaku: ‘¡Kawsachun reyninchik!’, nispa.

Israel nacionpa enemigonkunaqa hinallam kachkan. Saulta reypaq churasqallankumanta qepataqa Amon casta runakunaqa Israel runakunapa contranpi peleaq hamurqaku. Saulmi ichaqa tropankunawan Amon casta runakunata venceruptinmi Israel runakunaqa kusikurqaku reyninku Saul kasqanmanta.

Qatiqnin watakunapim, Saulqa Israel runakunata yanaparqa enemigonkunata vencenankupaq. Hinaspa Saulpaqa karqam Jonatan sutiyoq qarinchakuq churinpas. Jonatanñataqmi Israel runakunata yanaparqa enemigonkunata vencenankupaq. Filistea runakunam enemigonku kaspa Israel runakunata ñakarichiq karqaku. Hinaptinmi waranqanpi-waranqanpi Filistea runakunaqa huñunakururqaku Israel runakunapa contranpi peleanankupaq.

Chaymi Samuelqa chayamuspa Jehová Diospaq animalkunata kañapunankama suyananpaq Saulta nirqa. Ichaqa manaña Samuel chayamuptinmi Saulqa Filistea runakuna atacamunanta manchakuspa kikinpuni animalkunata kañarqa. Samuel chayaramuspanmi mana kasukuq kasqanmanta Saulta nirqa: ‘Jehová Diosmi maskanqa paypa agradonpaq kaq runata Israel runakunata kamachinanpaq’ nispa.

Chaymantapas, Saulqa huktawanmi Jehová Diosta mana kasukurqachu. Chaymi Samuelqa nirqa: ‘Ofrenda carnerokunamantapas payta kasukuymi, aswan allinqa. Jehová Diospa kamachisusqaykitam mana kasurqankichu, chaymi payqa rey kaynikimantam qarqorusunki’ nispa.

Kayqa allinninchikpaqmi anyawanchik. Imapipas Jehová Diosta kasukuyqa allin kasqantam qawachiwanchik. Qawachiwanchiktaqmi Jehová Diosta allin kasukuq runakunapas Saul hinam mana kasukuqña rikurirunanmanta. ¡Manamá chayna kaytaqa munanchikchu! ¿aw?