REY DAVIDMI manaraq wañukuchkaspa, Salomonman qorqa Jehová Diospa templon hatarichinanpaq planonkunata. Tawa watamanña gobiernachkaspanmi Salomonqa templo hatarichiyta qallarirqa, hinaspanmi qanchis wata partenpim qespirachirqa. Waranqantin-waranqantin runakunam llamkarqaku templo hatarichiypi, temploqa achka qollqepa chaninmi karqa achka qori-qollqewan rurachisqankumanta.

Chay templo ukupi iskay cuartokunaqa Diosman asuykuna karpanpi hina karqa. Ichaqa chay cuartokunamantapas huk chaynapiwanraqmi karqaku. Salomonqa Diospa contrato baulninta churachirqa templopa uku lawnin cuartopi, huknin cuartopiñataq churarqaku asuykuna karpapi kaq wakin kaqkunata.

Templo qespiruptinmi, kusikuyllawanña huñunakuspanku Diosta alabarqaku. Hinaptinmi Salomonqa templopa pationpi qonqorakuykuspa qawasqaykiman hina Diosta mañakurqa kaynata: ‘Jehová Dioslláy, cielokunapipas manam qamqa kamawaqchu, chaynaqa ¿imaynataq kay templo rurasqaypiqa yachawaq? Chaywanpas Dios Taytalláy, runaykikunapas kay sitio lawman qawarimuspa ruegakuptiykumá uyariykullawankiku’ nispa.

Salomon mañakusqanta tukuruptinmi hanaq pachamanta wichiykamurqa nina hinaspam ruparurqa lliw kañanapaq animalkuna wañuchisqankuta. Hinaptinmi Jehová Diospa kanchariynin temploman huntaykurqa. Chaynata ruraspam Jehová Diosqa qawachirqa templota, runakunata chaynataq Salomonpa mañakusqantapas allinpaq hapisqanta. Kunanqa manañam asuykuna karpamanñachu rinanku karqa yupaychanankupaq aswanqa Jehová Diospa templonmanña.

Una-unaytam Salomonqa yachaywan kamachikurqa, hinaspa runakunaqa kusisqam kawsakurqaku. Salomonmi ichaqa Jehová Diosta mana reqsiq huklaw nacionniyoq warmikunawan casarakururqa. ¿Rikuchkankichu chay uray pata dibujopi Salomonpa warminqa mamachata yupaychachkaqta? Hinaptinmi Salomontaqa chay warminkuna taytacha-mamachakunataña adorachirqaku. ¿Yachankichu chayna rurasqanwan imataq pasarqa? Salomonqa mana allin ruraqña rikurirurqa hinaptinmi Israel runakunapas manaña kusisqañachu karqaku.

Hinaptinmi Jehová Diosqa Salomonpaq piñakururqa, hinaspa nirqa: ‘Gobiernasqayki nacionta partispa serviqnikiman qosaq. Kawsanaykikamaqa mana chaynatachu rurasaq, ñoqaqa churikipa makinmantañam qechusaq. Manam llapallan naciontachu ñoqaqa qechusaq’ nispa. Qawasunchikyá imaynataq chaykunaqa pasarqa.