YAQA iskay watatañam Media law hinaspa Persia law runakuna Babilonia nacionpi munaychakuchkanku. ¡Qaway chaypi pasasqanta! Israel casta runakunaqa Babilonia nacionmantam lloqsimuchkanku. ¿Imaynatam librakurqaku? ¿Pitaq pasakunankupaqqa kachaykun?

Persia nacionpi Ciro sutiyoq reymi chayta rurarqa. Jehová Diosqa willakuqnin Isaiasta manaraq Ciro nacechkaptinmi kaynata qellqachirqa: ‘Qanmi tukuy munasqayta ruranki. Llaqtapa punkunkunam kicharayasqalla kanqa chaypi munaychakunaykipaq’ nispa. Cheqaptamá Babilonia nacionman yaykuruspan Ciroqa munaychakurqa. Llaqtapa punkunta tutapi kicharayachkaqta saqeruptinku Media law hinaspa Persia law soldadokuna yaykururqaku.

Chaymantapas Jehová Diospa willakuqnin Isaiasqa nillarqataqmi Jerusalen llaqtata chaynataq templontapas yapatawan hatarichinankupaq rey Ciro kamachinanmanta. ¿Chaynatachu rey Ciroqa kamachikurqa? Israel runakunatamá chaynata ruranankupaq kaynata nirqa: ‘Jerusalen llaqtaman rispa Jehová Diosnikichikpa templonta hatarichipuychik’ nispa. Chaytamá Israel runakunaqa ruranqaku.

Ichaqa manamá Babiloniapi llapallan tarikuq Israel casta runakunaqa Jerusalen karupi kaptin illaytaqa atirqakuchu. Yaqapas 150 leguata (huk leguaqa 5.500 metrom) illanankupaq hinam karqa, hinaspa achkallaña Israel casta runakunaqa yuyaqña otaq onqospanku hinaspa imapas harkaptin manam illaytaqa atirqakuchu. Riyta mana atiqkunatam rey Ciroqa kaynata nirqa: ‘Yanapaychikyá qori-qollqewan, imapas kapuqnikichikwan Jerusalen llaqta chaynataq Jehová Diospa templon ruranankupaq riqkunata’ nispa.

Chaymi Jerusalenman kutiq Israel runakunaqa achka regalokunata apaspa ripurqaku. Chaymantapas rey Ciroqa qorqa Jerusalen llaqtata Nabucodonosor purmachispa Jehová Diospa templonmanta tazonkunata hinaspa vasokunata apakusqantapas. Achkallatañam Israel runakunaqa tukuy imakunata apakurqaku.

Yaqa tawa killa illaruspankum Israel runakunaqa Jerusalenman chayarurqaku. Llaqtanku purmasqa mana runayoq kasqanmantaqa 70 watañam cumplikurun. Israel casta runakuna nacionninman kutiramuptinkupas, kanqapunim sasachakuy tiempoqa. Chaymantaqa qatiqninpiñam yachasunchik.