¿IMATAM chaypi rurachkanku? Chay runakunaqa hatun convidopim kachkanku. Chaymanmi Babiloniapi reyqa waranqantin ancha reqsisqa runakunata invitarurqa. Jerusalen llaqtapi saqueamuspanku Diospa templonmanta apamusqanku qori-qollqe vasokunata, platokunata chaynataq tazonkunatapas chay convidopi servichikuchkanku. Hinaptinmi qonqaymanta runapa maki dedonkuna rikuriruspa estucasqa perqapi qellqayta qallaykurqa. Chaymi llapallanku mancharikurqaku.

Chay tiempopaqqa Nabucodonosorpa willkan Belsasarñam reyqa karqa. Chaymi qaparispan qayachimurqa llaqtanpi yachayniyoq runakunata, hinaspa nirqa: ‘Wak qellqata pipas leey atiqqa chaynataq imam ninanta willaykuwaqniymanqa achkallatañam imatapas qosaq chaynataq gobiernoypipas payqa kanqa kimsa kaq gobiernaqmi’ nispa. Ichaqa chay yachayniyoq runakunaqa manam mayqanninkupas atirqakuchu chay qawasqanku qellqa leeyta, manataqmi atirqakuchu chaypi ima nisqanta willaytapas.

Qaparisqankuta reypa maman uyariruspanmi chay convido salaman yaykuspan nirqa: ‘Amayá qamqa pensamientopa intusqanqa rikuriruychu. Kay gobiernasqayki nacionpiqa kachkanmiki chuya dioskunapa espiritunpa huntaykusqan runa. Chayraykum abueloyki Nabucodonosorqa payta churarurqa yachaqkunapa jefen kananpaq. Chay runapa sutinqariki Danielmi. Chaynaqa Danieltayá qayamuychik, paymi willasunki chay qellqapa imam ninantaqa’ nispa.

Chaymi reypa qayllanman Danielta pusamurqaku. Reypa regalonkunata chaskiyta mana munasqanta niruspanña Danielqa willarqa imanasqataq abuelontaqa rey kayninmantapas Jehová Dios wischurusqanmanta. Hinaspa Danielqa nirqataqmi: ‘Aswanqa orgulloso rikuriruptinmi Jehová Diosqa payta castigarurqa.’

Chaymantapas Belsasarta nirqa: ‘Qamqa abueloyki Nabucodonosorta ima pasasqanta yachachkaspaykim mana humillakurqankichu. Qamqariki paypa templonpi vasokunatapas chaynataq tazonkunatapas aparachimuspaykim vinota upyakuchkanki. Hatunchachkankitaqmi kullumanta hinaspa rumimanta taytachakunatapas, Kawsachisuqniki Diosmanmi ichaqa mana graciasta qorqankichu. Chayraykum paypuni kachamurqa wak qellqaq makitaqa.’

Hinaspam Danielqa nillantaqmi: ‘Wak qellqaqa nichkan: MENE, MENE, TEKEL, UPARSIN’ nispam.

‘MENE ninanqa: Diosmi gobiernasqayki punchawkunata yupaspan puchukarachin, ninanmi. TEKEL ninanqa: Balanzapi pesasuptikim qamqa mana pesoyoq kasqanki, ninanmi. UPARSIN ninanqa: Gobiernoyki partesqa karuspam Media lawpi hinaspa Persia lawpi kaqkunaman qosqa kanqa, ninanmi’ nispa.

Chaymi Daniel rimachkaptinraq Media law chaynataq Persia law soldadokunaqa Babilonia nacionta atacanankupaq yaykuramurqaku. Hinaspanmi rey Belsasarta wañurachirqaku. ¡Hina chay tutallapim perqapi qellqapa nisqanqa cumplikururqa! Hinaptinqa, ¿imaynataq Israel casta runakunaqa kanqaku? Chaymantañam paykunamantaqa yachasunchik, ichaqa qawasunchikraqyá Danielta imam pasasqanta.