LLAKIKUNAPAQ kaqmi pasarun. Bautizaq Juanta wañurachinku. Juantaqa reypa warmin Herodiasmi cheqnirqa. Hinaptinmi reyta hikutaspan Juanpa umanta qorurachirqa.

Chaymanta yacharuspanmi Jesusqa llakikurqa. Hinaptinmi mana runapa kasqanman sapallan pasakurqa. Runakunam ichaqa risqanta qatirqaku. Jesusqa chay achkallaña runakunata qawaykuspanmi llakipayarikurqa. Chaymi Diospa munaychakusqanmanta willarqa, hinaspam sanoyachirqa paykuna ukupi kaq onqoqkunata.

Tutaykuchkaptinñam Jesuspa discipulonkunaqa payman asuykuspa nirqaku: ‘Ñam llumpay tardeña, kaypiqa manataqmi wasipas kanchu. Pasakuchunkuñayá hichpa llaqtachakunaman rispa mikuyta rantimunankupaq’ nispa.

Chaymi Jesusñataq nirqa: ‘Manam rinmankuchu, qamkunayá mikuykachiychik’ nispa. Hinaptinmi Felipeta qawarispan Jesusqa nirqa: ‘¿Maypitaq kaynaña runakunapaqqa mikuyta rantichwan?’ nispa.

Chaymi Felipeñataq nirqa: ‘Achka qollqepa chaninpi mikuyta rantispapas manach haypanmanchu sapakama asninkallaña mikuptinkupas’ nispa. Hinaptinmi Andres nirqa: ‘Kaypi kaq warmapam kachkan pichqa tantan, kapuchkantaqmi kankasqa iskay challwapas. Chaychallaqa manachá haypanmanchu kaynaña achka runakunapaqqa’ nispa.

Hinaptinmi Jesusqa nirqa: ‘Pastopi tiyachiychik llapa runakunata’ nispa. Hinaspanmi Jesusqa tantatawan kankasqa challwakunata hapiykuspam Diosman graciasta qorqa hinaptinmi tantatawan challwata partiruspan discipulonkunaman qorqa, paykunañataq runakunaman aypurqaku. Chaypim karqaku 5.000 qarikuna chaynataq waranqantin warmikunawan wawakunapas. Llapallankum mikurqaku saksanankukama. ¡Hinaspanmi discipulonkunaqa puchuqkunata hoqariptinku, huñurqaku 12 canasta huntataraq!

Jesusmi discipulonkunata boteman yaykuchirqa Galilea lawpi lamar qochata puntaspa chimpachkanankupaq. Tutaña kaptinmi sinchita wayramurqa hinaspa qochapa olankunapas hoqarikaramurqa boteta nisyullataña laqyastin. Chaymi discipulokunaqa mancharikurqaku. Hinaptinmi chawpi tutata qawarqaku paykunaman asuykamuq runata yakupa hawanta puristin. Chaymi mancharisqallaña qaparirqaku imam yakupa hawanta puriq kasqanta mana yachaspanku.

Jesusñataqmi nirqa: ‘Ñoqam kani, ama manchakuychikchu’ nispa. Paykunam ichaqa iskayrayachkarqaku. Pedroñataqmi nirqa: ‘Señorlláy, qam kaspaykiqa kamachimuwayá yakupa hawanta qanman hamunaypaq’ nispa. Chaymi Jesus nirqa: ‘Hamuy’ nispa. ¡Hinaptinmi Pedroqa botemanta uraykuspan puriyta qallaykurqa yakupa hawanta! Hinaspanmi mancharikuruspan chinkaykuyta qallarirqa, Jesusñataqmi salvaykurqa.

Chaymantapas yapatawanmi, Jesusqa waranqantin runakunata mikuykachirqa qanchis tantallawan as challwa kankasqapiwan. Chay kutipipas llapallankum mikurqaku saksanankukama. ¡Mayna allintamá Jesusqa runakunata yanapan! ¡Munaychakusqanpiqa manamá imamantapas preocupakusunchu!