JESUSQA llaqtakunapi onqoqkunata sanoyachistinmi rirqa. Hinaptinmi hichpanpi kaq llaqtachakunapipas yacharurqaku Jesuspa milagrokuna rurasqanmanta. Chaymi runakunaqa pusarqaku mana valeq makiyoqkunata, ñawsakunata, wistukunata chaynataq huk onqoykunawan ñakariqkunatapas. Hinaptinmi llapallankuta Jesusqa sanoyachirqa.

Kimsa wata masñam kachkan bautizaq Juanpa Jesusta bautizasqanmantaqa. Hinaptinmi Jesusqa apostolninkunaman nirqa Jerusalen llaqtaman riruptin chaypi wañurachiptinku kawsarimunanmanta. Manaraq chaykuna kachkaptinmi ichaqa hinalla onqoqkunata sanoyachichkan.

Huk punchawmi Jesusqa samana punchawpi yachachirqa. Judiokunapaqqa sabado punchawqa samana punchawmi karqa. Kaypi qawasqayki warmiqa 18 watañam derecho puriyta mana atispan kurkunpalla purirqa. Chaymi Jesusqa makinta warmipa hawanman churaykuptin chaylla derechakururqa. ¡Sanoyarun!

Chaywanmi sacerdotekunapa jefenkunaqa piñakururqaku. Hinaptinmi huknin jefenku llapallan runakunaman qaparispan nirqa: ‘Soqta punchawmi llamkanapaq punchawkunaqa. Chay punchawkunapi hamuptikichikyá sanoyachisunkichik, ichaqa amayá samana punchawpichu’ nispa.

Jesusñataq contestarqa: ‘¡Millay runakuna! Mayqannikichikpas samana punchawpiqa asnoykichikta paskaruspachá yakuman pusaruwaqchik. Chaynaqa, ¿manachu kay warmiqa 18 wataña ñakarisqanmanta sanoyachisqa kanman?’ nispa. Chaynata Jesus niruptinmi chay mana allin runakunaqa penqakurqaku.

Chaymantam apostolninkunawan Jesusqa Jerusalen llaqtaman rirqaku. Chaymi Jerico llatapa hichpanpiña kachkaptinkum iskay ñawsakunaqa qayaykachakurqaku kaynata: ‘Jesus, llakipayariykullawaykuyá’ nispa.

Hinaptinmi Jesusqa chay ñawsakunata qayaspa tapurqa: ‘¿Imatataq qamkunapaq ruranayta munankichik?’ nispa. Paykunañataq nirqaku: ‘Taytáy, ñawillayku kicharikunantam munaniku’ nispa. Hinaptinmi Jesusqa ñawsakunapa ñawinta llapchaykuptin ¡chaypunilla qawarikururqaku! Yachankichu, ¿imanasqataq chayna milagrokunata Jesusqa rurarqa? Runakunata kuyaspan, hinaspa paypi iñinankupaqpas. Kaymi qawachiwanchik kay Allpata Jesus kamachikamuptinqa manaña pipas onqonanta.