¡YAW, QAWAY! ¿Imataq chaypiqa kachkan? ¿Imanakuruntaq pampapi kaq mozochaqa? ¡Chay wasimanta huknin lloqsimuq runaqa Pablom! ¿Qawachkankichu Timoteotapas? ¿Ventanamantachu chay mozochaqa wichiykamunman karqa?

Wichiykamunmá. Troas llaqtapim Pabloqa discipulokunata Bibliamanta yachachichkarqa. Payqa paqarinnintillan buquepi pasakunan kaptinmi yacharqa paykunawan unaymantaña tupanankuta. Chaymi chawpi tutakama rimarqa.

Kay mozochapa sutinqa Euticom karqa, paymi ventanapi tiyachkarqa hinaspa puñururqa. ¡Hinaspa iskay kaq altospa ventanamanta wichiykurqa! Chaymi qawasqaykiman hina chay runakunaqa llakisqallaña kachkanku. Runakuna mozochata hoqariruptinku llakikunankupaqmi karqa. ¡Wañurusqa!

Chaymi Pabloqa mozocha wañurusqanta qawaykuspanmi hawanman chutakuykuspan abrazaykurqa. Hinaspanmi nirqa: ‘Ama manchakuychikchu, kawsachkanmi’ nispa. ¡Chaynamá! ¡Chayqa milagrom! ¡Pablomá kawsarirachin! Hinaptinmi runakunaqa anchallataña kusikurqaku.

Chaymanta kaqllamanta seqaruspanku mikurqaku. Hinaspanmi achikyanankama Pablo rimarqa. ¡Euticoqa chay tuta yapamantaqa manachiki puñururqachu! Hinaptinmi Pablowan Timoteoqa chaynataq puriqmasinkunapas buqueman seqaruspa pasakurqaku. ¿Yachankichu mayman risqankuta?

Pabloqa kimsa kaq kutitaña predicastin illasqanta tukuruchkanña. Chay illasqan kutipi payqa Efeso llaqtapi kimsa watata qepakurqa. Chaymi, iskay kutipi illasqanmantaqa kay kutipim ichaqa astawanraq unaramurqa.

Troas llaqtamanta pasakuspanku buqueqa chayarqa Mileto llaqtaman. Mileto llaqtapi Pablo kachkaspan hinaspa Efeso llaqtapas hichpallapi kaptinmi Efesopi iñiqkunapa ancianonkunata qayachirqa chay kutillataña rimaykunanpaq. Chaymanta, buqueqa pasakuchkaptin, ¡maynallatañam llakikurqaku Pablo pasakusqanta qawaspanku!

Hinaptinmi buqueqa Cesarea llaqtaman kutirqa. Chay llaqtapi Felipe sutiyoq discipulopa wasinpi Pablo kachkaptinmi Diosmanta willakuq Agabo willakurqa Jerusalenman chayaykuptin Pablota presocharunankumanta. Hinaptinmi chaynam karqa, willakuq Agabopa nisqanman hina. Chaymanta Cesarea llaqtapi carcelpi iskay wata masña kachkaspan, Roma llaqtaman Pablota pasachirqaku chaypi kamachikuq rey Cesar juzgananpaq. Qawasunchikyá imataq pasarqa Roma llaqtaman illachkaptin.