KAYPI apostol Pablowan qawasqayki mozopa sutinqa Timoteo. Listra llaqtapim Timoteoqa ayllunwan yachan. Mamanpa sutinqa Eunice karqa abuelanpañataq Loida.

Kunankamaqa kimsa kutiñam Pablopa Listra llaqtaman risqanqa. Yaqa watallaraqmi Bernabeywan Pabloqa kay llaqtapi predicayta qallarisqankumanta. Kunanñataq Pabloqa amigon Silaspiwan kutiramun.

¿Yachankichu imatam Pabloqa Timoteota nirqa? Kaynatam nirqa: ‘¿Munawaqchu Silaswan ñoqapa puriysiwaqniyku kayta? Yanapawankimanku huklaw llaqtakunapi yachaq runakunaman predicaypi’ nispa.

Timoteoñataqmi nirqa: ‘Hakuyá riysisqayki’ nispa. Chaymi, chay punchawkunallam Timoteoqa ayllunta saqeykuspan Pablowan Silaspiwan pasakurqa. Tukuy hinastin llaqtakunaman risqankumanta manaraq yachachkasparaqyá qawasuchik imataq Pablotaqa pasarqa. Damasco llaqtaman Pablo richkaptin Jesuspa rikuriykusqanmantaqa 17 watañam.

¡Yuyariy, Pabloqa Jesuspa discipulonkunata qatikachananpaqmi Damasco llaqtamanqa hamurqa, kunanmi ichaqa kikinpas Jesuspa discipulonña! Chaymantam, Pablotaqa wakinnin enemigonkuna wañurachiyta munarqaku, aswanqa discipulomasinkuna yanaparqa lluptinanpaq. Hatun canastapim Pablotaqa uraykarachirqaku llaqtapa muyuriqnin perqanta.

Chaymantaqa, Antioquia llaqtamanmi Pabloqa predicaq rirqa. Chay llaqtapim Jesucristopa discipulonkunataqa cristiano nispa suticharurqaku. Hinaptinmi Pablotawan Bernabeyta kamachirqaku Antioquiamanta huklaw llaqtakunaman rispanku predicanankupaq. Chaynapim Timoteopa yachasqan Listra llaqtaman chayarurqaku.

Kunanñataqmi, yaqa wata pasaqllata Pabloqa iskay kaq kutita illasqanpi kaqlla Listra llaqtaman kutirun. Pablowan Silaspiwan Timoteo pasakuptin, ¿yachankichu maymanmi rirqaku? Mapatayá qawasunchik yachananchikpaq.

Puntataqa, hichpallapi kaq Iconio llaqtaman rirqaku, chaymanta Antioquia llaqtaman pasarqaku. Chaymantañam Troas llaqtaman rirqaku, chaymantataq Filipos, Tesalonica hinaspa Berea llaqtamanpas rirqaku. ¿Qawachkankichu Atenas llaqtata? Chaypipas Pablo predicarqa. Chaymanta wata partenta Corinto llaqtapi predicarqaku. Chaymanta Efeso llaqtapipas mana unaytachu qepakurqaku. Hinaptinmi Cesarea llaqtaman buquepi kutirqaku, hinaspapas Antioquiaman pasarqa chaypi samananpaq.

Chaynapim Timoteoqa pachak legua mastaraq illaspa “allin noticiakuna” predicaypi Pablota yanaparqa chaynataq congregacionkuna kananpaqpas. Wiñaruspaykiqa, ¿Timoteo hinachu Diospaq sonqo kanki?