JESUSPA sepulturanmanta Pedrowan Juan pasakuptinkum, Mariaqa chaypim waqakustin qeparurqa. Hinaspa sepulturapa ukunta qawaykuspa rikururqa iskay angelkunata. Chaymi paykunaqa nirqaku: ‘¿Imanasqataq waqachkanki?’, nispa.

Mariañataqmi nirqa: ‘Señorniytam aparusqaku chaymi mana yachanichu mayman churasqankutapas’, nispa. Hinaspanmi muyuriykuspan runata rikururqa. Hinaptinmi chay runaqa tapurqa: ‘¿Pitataq maskachkanki?’, nispa.

Mariaqa piensarqa chay runa huertapi llamkaq kasqanta hinaspa Jesuspa cuerpontapas aparusqanta. Chaymi payta nirqa: ‘Señor, qam aparuspaykiqa willaykuwayá maypim churaramusqaykita’, nispa. Chay runaqa Jesusmi. Mariam ichaqa mana yacharqachu Jesus kasqanta. Sutinmanta Mariata qayaruptin ichaqa reqsirurqa. Hinaptinmi Mariaqa Jesuspa discipulonkunaman kallpaspan nirqa: ‘¡Señortam rikuykuni!’, nispa.

Chaymantam chay punchawllapi, iskaynin discipulonkuna Emaus llaqtaman richkaptinku, huk runa asuykuspan paykunawan rirqa. Jesuspa wañukusqanwanmi discipulonkunaqa llakisqallaña karqaku. Richkaptinku, chay runaqa Bibliamanta imatapas entiendechirqa sonqonku tiyanankama. Chaymanta, samaspanku mikunankupaqña kachkaptin iskaynin discipulonkunaqa reqsirurqaku Jesus kasqanta. Jesusñataqmi qawachkaptinku chinkaykurqa, hinaptinmi paykunaqa Jerusalenman kutirqaku apostolkunaman willakunankupaq.

Chaykama Jesusqa rikuriykamurqa Pedromanpas. Chaymi wakinkunaqa kusirikurqaku kaymanta uyarispanku. Hinaptinmi iskaynin discipulokunaqa Jerusalenman rispanku apostolkunata tarirurqaku. Hinaspam willakurqaku ñanta richkaptinku Jesus rikuriykusqanmanta. Chaynata willakuchkaptinku, ¿yachankichu imataq hukmanyanapaq hina pasasqanta?

Dibujota qaway. Jesusqa discipulonkunapa kasqan cuartopim rikuriykurqa wichqasqa kachkaptinpas. ¡Maynataraqchá discipulonkunaqa kusirikurqaku! ¡Mayna kusikunapaqmi chay punchawqa karqa! ¿Yupawaqchu hayka kutitaña Jesus rikuriykusqanta? ¿Pichqañachu?

Jesus rikuriykuptin Tomasllam mana chaypichu karqa. Chaymi wakinnin discipulokuna willarqa: ‘Rikuykunikum Señorta’, nispa. Tomasñataqmi ichaqa kikinraq mana rikuykuspanqa mana creenantam nirqa. Chaymanta, pusaq punchaw qepata kaqllamantam apostolkunaqa wichqasqa cuarto ukupi kachkanku, chaypaqqa Tomaspas chaypim kachkan. Hinaptinmi qonqaymanta Jesus rikuriykurqa. Chayraqmi Tomasqa creerurqa.