QAWAY Pabloqa makin cadenasqa kachkan, qawaytaq Roma llaqtayoq soldadopa cuidasqantapas. Pabloqa Roma llaqtapim preso kachkan. Chaypim Roma nacionpa reynin Cesar juzgananpaq suyarqa. Preso kachkaspanmi watukuqninkunata chaskirqa.

Roma llaqtaman chayaruspanmi Pabloqa kimsa punchawmanta chaypi reqsisqa judiokunata qayachirqa. Chaymi, Romapi kaq judiokunaqa hamurqaku. Pabloñataqmi Jesusmanta chaynataq Diospa munaychakusqanmanta paykunaman willarqa. Wakinqa nisqanta creespanku Cristopa qatiqninña karqaku, wakinñataqmi mana creerqakuchu.

Chaymantapas Pabloqa cuidaqnin soldadokunatapas predicarqa. Iskay wata preso kaspanmi Pabloqa llapallan payman riqkunata predicarqa. Chayraykum Roma nacionpi rey Cesarpa palacionpi kaqkunapas Diospa Munaychakusqanmanta sumaq noticiakunata uyarirqaku, hinaspam wakinkunaqa cristianoña karqaku.

Ichaqa, ¿pitaq Pablota watukuq mesapi qellqaqqa? ¿Story 110 Yachankichu pitaq payqa? Timoteomá. Paypas Diospa Munaychakusqanmanta predicasqanmantam preso karqa, kunanmi ichaqa libreña kachkan. Kunanñataqmi Pablota yanapaq hamurqa. ¿Yachankichu imatataq qellqachkan? Qawasunchikyá.

¿Yuyarichkankichu 110 kaq willakuypi Filipos chaynataq Efeso llaqtakunata? Chay llaqtakunapi congregacionkuna kananpaqmi Pabloqa yanaparqa. Preso kaspanmi Pabloqa chaypi kaq cristianokunaman cartata qellqarqa. Chaymi Efesios chaynataq Filipenses sutichasqa cartakunaqa Bibliapim kachkan. Hinaptinmi Pabloqa Timoteoman nirqa imam qellqananta Filipos llaqtapi iñiq amigonkunaman.

Filipos llaqtapi iñiqkunaqa Pablopaqmi sumaq sonqoyoq karqaku. Pablo preso kachkaptin regalota apachimurqaku, chaymi payqa agradecekuchkan. Chay regalotaqa Epafroditom apamurqa. Ichaqa llumpayta onqoruspam yaqalla wañukurqa. Kunanñataq allinyarunña hinaspam chaylla llaqtanman kutinqa. Paymá apanqa Pablopa chaynataq Timoteopa cartankuta Filipos llaqtaman kutispa.

Pabloqa preso kachkaspanmi Bibliapi kaq iskay cartatawan qellqarqa. Hukninmi Colosas llaqtapi cristianokunapaq karqa. ¿Yachankichu imaynatam suticharurqaku? Colosenses nispam. Huknintañataq Colosas llaqtapi iñiqmasin amigon Filemonman cartarqa. Chay cartapiqa Onesimo sutiyoq Filemonpa sirvientenmantam willachkan.

Onesimoqa Roma llaqtaman ayqekurqa Filemonmanta lluptiruspan. Payqa imaynatach Pablo chaypi presochasqa kasqanta yacharurqa. Watukuptinmi Pabloqa Diosmanta willarqa. Tiempopa risqanman hina Onesimopas Jesuspa qatiqninña karqa. Chayraqmi Onesimoqa pesapakurqa ayqemusqanmanta. Hinaptinqa, ¿yachankichu imatataq Pabloqa Filemonman cartasqanpi nirqa?

Pabloqa Filemontam nirqa Onesimota pampachananpaq. Nirqataqmi: ‘Kutichimuchkayki. Payqa manam sirvientellaykichu, aswanqa Señorninchikpi iñiqmasinchik wawqekiñam’ nispa. Hinaptinmi Colosas llaqtaman kutispan Onesimoqa chay iskay cartata aparqa, hukninqa Colosas llaqtapi iñiqkunapaq huknintañataq Filemonpaq. ¡Maynataraqchá Filemonqa kusikurqa sirvienten Onesimoqa pay hina cristianoña kasqanta yacharuspan!

Filipos llaqtapi iñiqkunaman chaynataq Filemonman cartaspanmi allin noticiakunata willarqa. Filipospi kaqkunata nirqa: ‘Kachamusqaykichikmi Timoteota. Kikiypas qawaqnikichikmi chaylla hamusaq’ nispa. Filemontañataq nirqa: ‘Wasikipi samakunaypaqyá allichaykapuway’ nispa.

Pabloqa preso kasqanmanta lloqsiruspanmi tukuy hinastinpi cristianokunata watukuq rirqa. Chaymantam Roma llaqtapi Pablota yapatawan presocharurqaku. Chaypaqqa wañurachinankuta musyakurqa. Chaymi Timoteoman qellqarurqa chaylla hamunanpaq. Nirqataqmi: ‘Manam kachakuykurqanichu iñisqaymantaqa, chaymi Diosninchik qowanqa premioyta’ nispa. Pablopa wañusqan qepa watakunallapim Jerusalentaqa Roma nacionpa tropankunaña yapatawan puchukarachirqaku.

Bibliapim ichaqa, manam kaykamallachu willan. Jehová Diosmi apostol Juanta tukupaynin librokunataraq qellqachirqa, chaykunapa hukninmi Apocalipsis libro. Chay libroqa hamuq tiempomantam willakun. Qawasunchikyá imaynam hamuq tiempo kanqa.