OLIVOS moqopi Jesus kachkaptinmi rimasqanmanta tawa apostolninkuna sapanpi tapuykurqaku. Paymi nirqa templo tuñichisqa kananmanta, ñawpaqtapas rimarurqañam ‘kay pacha puchukachisqa’ kananmanta (Mateo 13:40, 49). Chaymi apostolkunaqa kaynata tapurqaku: “¿Haykapitaq kay nisqaykikunaqa kanqa? ¿Imaynataq yachasaqku kutimunaykimantaqa hinaspa kay pacha puchukananmantaqa?”, nispa (Mateo 24:3).

Jesusñataqmi nirqa, Jerusalen hinaspa templopas manaraq tuñichisqa kachkaptin imakuna pasananmanta. Chay nisqanqa manam chay tiempollapaqchu karqa, aswanqa hamuq tiempopim astawanraq enteron pachapi cumplikunan karqa. Jesus haykapi kutimunanmanta runakuna yachanankupaqqa, señaltam qawananku karqa, chay señalqa huk tiempollapim enteron pachapi pasakunan karqa. Chaymi qawachinman Diospa Munaychakuyninpi Jesus kamachiy qallaykusqanta, hinaspa mana allinkunata chinkachinanmanta chaynataq hawkayayta apamunanmantapas. Jesuspa chay rimasqankuna cumplikusqanmi qawachinan karqa tukupay tiempopi kawsasqanchikta hinaspa sumaq kawsakuy qallarinanmantapas.

Jesusqa nirqam hanaq pachapi kamachiyta qallaykuptin, enteron Pachapi guerrakuna, yarqaykuna, terremotokuna hinaspa onqoykuna kananmanta. Autoridadkunapa kamachisqankunatapas manañam kasukunmankuñachu karqa. Chaymantapas cheqap qatiqninkunam llapan nacionkunapi Diospa Gobiernonmanta willananku karqa. Hinaspam chay señalqa ‘llumpa-llumpay ñakariy punchawkunapi’ tukunan karqa (Mateo 24:21).

¿Imaynatam cristianokuna yachanmanku karqa chay ñakariy punchawkuna hichpaykamusqanta? Jesusmi qatiqninkunaman nirqa ‘higos sachamanta’ yachanankupaq (Mateo 24:32). Higos sacha ikllirimuptinqa yachanchikmi poqoy tiempo hichpamusqanta. Chaynataqmi Jesuspa nisqankuna huk tiempollapi pasakuptinqa yachananchikmi karqa puchukay tiempo hichpaykamusqanta. Jesusqa nirqataqmi chay llumpa-llumpay ñakariy punchaw haykapi kananta Taytallan yachasqanta. Chaymi nirqa: ‘Listollayá suyawaychik haykapi kutimunayta mana yachasqaykichikrayku’, nispa (Marcos 13:33).

(Mateo 24, 25; Marcos 13; Lucas 21.)