Kamachiq Nabucodonosorqa musqukusqanwan puñuytapas mana atispanmi layqa runakunata nirqa: “Musquyniypa ima ninan kasqantayá willawaychik”, nispa. Paykunañataqmi nirqaku: “Willaykuwaykuyá musqukusqaykita”, nispa. Ichaqa kamachiqmi nirqa: “Qamkunam willawanaykichikqa, mana chayqa wañurachisqaykichikmi”, nispa. Kaqllam nirqaku: “Ima ninan kasqanta willanaykupaqyá musqukusqaykita willawayku”, nispa. Kamachiqñataqmi nirqa: “¡Willawaychik!”, nispa. Kaqmantam nirqaku: “Manam pipas kayna mañakusqayki ruwaytaqa atinmanchu”, nispa.

Nabucodonosorqa llumpayta piñakuruspanmi lliw yachaysapakunata wañuchinankupaq kamachirqa. Chaywanqa nichkarqam Danieltawan amistadninkunatapas wañuchinanpaq, chaymi Danielqa amistadninkunawan Diosta mañakurqaku.

Chay musquypa ima ninan kasqanta yachananpaqmi Jehova Diosqa Danielta yanaparqa, chaymi Danielqa kamachiqpa sirviententa nirqa: “Ama wañuchiwaykuchu, ñuqam musquyninmanta willamusaq”, nispa. Kamachiqman pusaruptinmi Daniel nirqa: “Diosmi hamuq punchawmanta willasuchkanki. Musquynikipim qawarqanki hatunkaray runa kaqlla sayaqta: Umanmi kasqa qurimanta, qasqunwan brazonñataqmi qullqimanta, wiksanmanta muqunkamañataqmi broncemanta, chakinñataqmi fierrowan mitu chaqrusqa. Chayna qawachkaptikim urqumanta rumi kururakaykamuspan chakinpi hapiruptin chinkarurqa. Chay rumiñataqmi kay pachatapas tapaykunankama hatu-hatun urquña rikurirurqa”, nispa.

Chaymantam Danielqa nirqaraq: “Chay qurimanta umaqa kamachikuynikim. Qullqimanta kaqñataqmi tupan qipaykiman huk kamachiqman.  Qipanmanñataqmi bronceman rikchakuq kamachiq rikurimunqa, chayqa enteron pachatam kamachinqa. Chaypa qipanmanpas fierroman rikchakuq atiysapallaña kamachiqmi rikurimunqa. Tukupaypi rikurimuq kamachiqpa munaychakusqanmi iskayman rakisqa kanqa, hukninmi fierro hina atiysapa kanqa hukninñataqmi mitu hinalla. Urqu hina rumiñataqmi tupan Jehova Diospa kamachimuyninwan. Diosmi kay pachapi lliw kamachiqkunata chinkachispan wiña-wiñaypaq kamachinqa”, nispa.

Nabucodonosorqa qunqurakuykuspam Danielta nirqa: “Diosnikim musquyniytaqa willaykusunki, payqa atiyniyuqmi”, nispa. Chaymi llapallan yachayniyuq runakunapa jefen kananpaq hinaspa Babiloniapi llaqtakunata kamachinanpaq Danielta akllarurqa. Diosqa Danielpa mañakusqantam uyariykurqa.