Huk tutam kamachiq Nabucodonosor hukmanta sueñokururqa. Chaywan puñuytapas mana atispanmi layqa utaq adivinaq runakunata nirqa: “Sueñoyniypa ima ninan kasqantayá willawaychik”, nispa. Paykunañataqmi nirqaku: “Willaykuwaykuyá sueñokusqaykita”, nispa. Ichaqa kamachiqmi nirqa: “Qamkunam willawanaykichikqa, manachayqa wañurachisqaykichikmi”, nispa. Kaqllam nirqaku: “Ima ninan kasqanta willanaykupaqyá sueñokusqaykita willawayku”, nispa. Kamachiqñataqmi nirqa: “¡Willawaychik!”, nispa. Kaqmantam nirqaku: “Manam pipas kayna mañakusqayki ruwaytaqa atinmanchu”, nispa.

Hinaptinmi Nabucodonosorqa llumpayta piñakuruspan lliw yachaysapakunata wañuchinankupaq kamachirqa. Danieltawan amistadninkunatapas wañuchinankum karqa. Danielmi ichaqa kamachiqta nirqa suyaykunanpaq, chaynapi sueñokusqanpa ima ninan kasqanta willananpaq. Chaymantam Danielqa amistadninkunawan Diosta mañakurqaku yanapaykunanpaq.

Chay sueñoypa ima ninan kasqantam Jehova Diosqa musquyninpi hina Danielman qawachirqa, chaymi Danielqa kamachiqpa sirviententa nirqa: “Amayá wañuchiychu yachaysapa runakunataqa, ñuqam kamachiqman willasaq sueñokusqanpa ima ninan kasqanta”, nispa. Kamachiqman pusaruptinmi Daniel nirqa: “Diosmi hamuq punchawmanta willasuchkanki. Sueñoynikipim qawarqanki hatunkaray runa kaqlla sayaqta: Umanmi kasqa qurimanta, qasqunwan makinkunañataqmi kasqa qullqimanta, wiksanwan piernankunañataqmi kasqa broncemanta, muqunmanta chakinkamañataqmi kasqa fierromanta, chakinkunañataqmi kasqa fierrowan mitu chaqrusqa. Chayna qawachkaptikim urqumanta rumi kururakaykamuspan chakinpi hapiruptin pasaypaqta ñutururqa, hinaptinmi wayra aparurqa. Chay rumiñataqmi kay pachatapas tapaykunankama hatu-hatun urquña rikurirurqa”, nispa.

Chaymantam Danielqa nirqaraq: “Chay qurimanta umaqa kamachikuynikim. Qullqimanta kaqñataqmi tupan ­qipaykiman huk kamachiqwan. ­Qipanmanñataqmi bronceman rikchakuq kamachiq rikurimunqa, payqa enteron pachatam kamachinqa. Chaypa qipanmanpas fierroman rikchakuq atiysapallaña kamachiqmi rikurimunqa. Tukupaypi rikurimuq kamachiqpa munaychakusqanñataqmi rakinasqa kanqa, wakinpim fierro hina kanqa, wakinpiñataqmi mitu hinalla kanqa. Urquchakuruq rumiñataqmi tupan Jehova Diospa gobiernonwan. Diosmi kay pachapi lliw kamachiqkunata chinkachispan wiña-wiñaypaq kamachinqa”, nispa.

Chayta uyariruspanmi Nabucodonosorqa qunqurakuykuspan Danielta nirqa: “Diosnikim sueñoyniytaqa willaykusunki, pay hinaqa manam pipas kanchu”, nispa. Chaymantapas Danieltam akllarurqa llapallan yachayniyuq runakunapa ­kamachiqnin kananpaq hinaspa Babilonia llaqtata kamachinanpaq. Diosqa Danielpa mañakusqantam uyariykurqa.