Pascua fiesta tukuytam Jesusqa qatiqninkunawan Galilea llaqtaman kutirqaku. Hinaspankum Samaria lawpi Jacobpa yaku tomanan pozoman chayarurqaku, chay pozopi Jesus samanankamam qatiqninkunaqa mikuy rantiq rirqaku.

Hinaptinmi Samariamanta warmi yaku hurquq hamururqa. Yakuta Jesus mañakuptinmi chay warmiqa tapurqa: “¿Imanasqam rimapayawanki? Judiokunaqa manam Samaria runakunawanqa rimankuchu”, nispa. Jesusñataqmi nirqa: “Pim kasqayta yachaspaykiqa, qanmi yakuta mañawankiman hinaptinmi kawsay qukuq yakuta quykiman”, nispa. Warmiñataqmi nirqa: “Señor manam imaykipas kanchu yakuta hurqunaykipaqqa”, nispa. Jesusñataqmi nirqa: “Ñuqapa qusqay yaku tomaqqa manañam yakunayachikunqañachu”, nispa. Warmiñataqmi nirqa: “Quykuwayá”, nispa.

Chaymantam Jesusqa chay warmita nirqa qusanta qayamunanpaq. Chay warmiñataqmi willakurqa mana qusayuq kasqanta, chaymi Jesus nirqa: “Imam kaqtam willaykuwanki, qamqa pichqa kutikamam casarakurqanki, kunanñataqmi huk runawanña mana casarakuspa yachachkanki”, nispa. Chayta uyariruspam warmiqa yacharurqa Jesusqa Diosmanta willakuq kasqanta, hinaspam nirqa: “Ñuqaykuqa ninikum kay urqupi Diosta yupaychanaykupaq, qamkunam ichaqa ninkichik Jerusalenllapi yupaychanapaq. Diospa akllasqan runa chayamuptinñam  yachasun imaynata Diosta yupaychanapaq”, nispa. Chaynata niptinmi Jesusqa Diospa akllasqan pay kasqanmanta willaykurqa.

Chayta yacharuspanmi chay warmiqa llaqtamasinkunamanpas willaq rirqa. Hinaptinmi chay runakunaqa Jesuspa yachachisqanta uyariq rirqaku.

Chaymantapas Jesusqa iskay punchawmi Samaria runakunaman yachachirqa. Chaynapim runakunaqa manaña iskayrayaspa Samaria warmitapas nirqaku: “Kunanqa yachanikuñam Jesusqa lliw runakunata salvaq kasqanmanta”, nispa.