Jesuspa kawsarirusqan qipallamanmi Pedroqa Tomaswan, Santiagowan, Juanwan hinaspa wakinkunapiwan Galilea lamar quchapi tukuy tuta challwarqaku, ichaqa manam huktapas hapirqakuchu.

Chayllaraq achikyaytam quchapa patanpi runata rikururqaku. Chay runam nirqa: “¿Hapirunkichikchu hukllatapas?”, nispa. Paykuna “manam” niptinkuñataqmi, chay runa nirqa: “Botepa waqtanman wischuychik mallaykichikta”, nispa. Chaymi wischuykuspanku achkallay-achka challwata hapirurqaku. Hinaptinmi Juanqa Jesus kasqanta musyaruspan nirqa: “¡Jesusmi kasqa!”, nispa. Pedroñataqmi yakuman chaylla pawaykuspan yakullanta Jesusman chayarurqa. Wakinkuñataqmi botewan qatirqaku.

Yakupa patanman chayaruspankum Jesustaqa ninapi challwa kankachkaqta tarirurqaku, tantapas kachkasqam. Challwata yapamunankupaq  niruspanmi Jesusqa nirqaraq: “Hamuychik mikunapaq”, nispa.

Mikuyta tukuruptinkum Pedrota Jesus tapurqa: “¿Challwakunamantapas astawanchu kuyawanki?”, nispa. Pedrom nirqa: “Arí, kuyasqaytaqa yachankim”, nispa. Hinaptinmi Jesus nirqa: “Chaynaqa chitachaykunatayá mikuchiy”, nispa. Kaqmanta Jesus tapuptinmi Pedro nirqa: “Kuyaykim”, nispa. Jesusñataqmi nirqa: “Ovejachaykunatayá michiy”, nispa. Kimsa kutipi Jesus tapuptinmi Pedroqa llakirikuspan nirqa: “Qamqa tukuytam yachanki. Yachankim kuyasqaytaqa”, nispa. Chaymi Jesus nirqa: “Ovejachaykunatayá mikuchiy”, nispa. Nirqataqmi: “Hinallayá qatiway”, nispapas.