Jesusmi apostolninkunawan chawpi tuta pasayta hunta killa kachkaptin Getsemani huertaman chayarurqaku. Chaypim apostolninkunata Jesus nirqa: “Kayllapim kanaykichik rikchan-rikchanlla”, nispa. Chaynata niykuspam wak lawman rispan qunqurakuykuspa taytanta mañakurqa: “Munaynikiyá ruwasqa kachun”, nispa. Hinaptinmi Jehova Diosqa angelninwan kallpanchaykurqa. Chaymanta kutispanmi Jesusqa apostolninkunata puñuchkaqta tariruspan nirqa: “¡Rikchariychik! Kaypiñam presochawaqniykunaqa”, nispa.

Judasqa yacharqañam Jesus maypi kasqanta achka kutikama chay huertaman riysisqanrayku, chaymi llapa runakunata pusarikuspan Jesusman chayarurqa. Chay runakunaqa espadayuq hinaspa kaspiyuqmi rirqaku. Hinaptinmi Judasqa soldadokunaman riqsichinanpaq Jesusta rimakuykuspan muchaykurqa. Hinaptinmi Jesus nirqa: “¿Muchaykuwasparaqchu qipanchawachkanki?”, nispa.

Hinaspam Jesusqa ñawpaqman ichiykuspan chay runakunata tapurqa: “¿Pitataq maskachkankichik?”, nispa. Chay runakunañataqmi nirqaku: “Nazaretmanta kaq Jesustam”, nispa. Chaymi “ñuqam kani” nispa Jesus niykuptin, runakunaqa qipaman wichiykurqaku. Kaqmanta Jesus tapuptinmi runakunañataq nirqaku: “Nazaretmanta kaq Jesustam”, nispa. Hinaptinmi Jesus nirqa: “Ñam nikichikña ñuqa kasqayta. Paykunataqa saqiychikyá pasakunankupaq”, nispa.

Chayta qawaspanmi Pedroqa Malco sutiyuq runapa rinrinta qurururqa, chay runaqa sacerdotekunapa jefenpa runanmi karqa. Jesusmi ichaqa chay runapa rinrinta sanoyarachispan Pedrota nirqa: “Espadaykita kutiykachiy. Espadawan peleaqqa espadawanmi wañunqa”, nispa. Soldadokuna Jesusta hapiruspa chakintawan makinta  wataruptinmi apostolninkunañataq ayqikurqaku. Hinaspam runakunaqa Jesusta pusarqaku riqsisqa Anas sutiyuq sacerdoteman. Anasñataqmi Jesusta tapupayaruspan pusachirqa sacerdotekunapa jefen Caifasman.