Filipos llaqtapim yacharqa demoniopa munaychakusqan sipas, payqa demonioyuq kaspanmi runata ima pasananmanta adivinaq, chaymi patronninkunaqa chaywan achka qullqita chaskikuqku. Filipos llaqtaman Pablowan Silas chayaruptinkum chay sipasqa mayman riptinkupas qatiq, hinaspapas ukunpi kaq demonio qayaykachachiptinmi kaynata niq: “Kay runakunaqa hanaq pachapi Diospa runankunam”, nispa. Chaymi Pablo chay sipaspa ukunpi kaq demoniota nirqa: “¡Jesuspa sutinpim kamachiki kay sipasmanta lluqsinaykipaq!”, nispa. Hinaptinmi demonioqa chaylla lluqsirurqa.

Chay sipaspa patronninkunam manaña qullqita chaskispanku llumpayta piñakururqaku, chaymi Pablotawan Silasta hapiruspanku pampanta aysarqaku llaqtata kamachiqkunaman, hinaspam nirqaku: “¡Kay runakunam autoridadninchikpa kamachisqanta mana kasukuspanku llaqtanchikpi chaqwata ruwachkanku!”, nispa. Llaqtata kamachiqkunañataqmi maqaparachispanku carcelman hinarachirqaku. Hinaptinmi carcel cuidaqqa uku law tutayay cuartoman paykunata hinarurqa, hinaspam uchkuyuq tablawan paykunapa chakinta hapirachirqa.

Carcelpi kaspankum Pablowan Silasqa Jehova Diospaq takirqaku, chaytam presomasinkunapas uyarirqaku. Hinaptinmi qunqayllamanta chawpi tutata allpa pacha kuyuptin carcelpa punkunkunapas kichakururqa, presokunapa cadenankupas hinaspa chakinkuta tablawan hapichisqankupas kachakuykurqam. Carcel cuidaqñataqmi carcelpa punkunkunata kicharayachkaqta qawaykuspan presokuna lluptirusqankuta piensarqa, chaymi espadanwan tuksikuruyta munarqa.

Chayllam Pablo kallpawan nirqa: “¡Ama imanakuychu, kaypim llapayku kachkaniku!”, nispa. Chaymi carcelta cuidaqqa Pablopa hinaspa Silaspa ñawpaqninman kallpaspan qunqurakuykurqa, hinaspam nirqa: “¿Imatataq ruwayman salvakunaypaq?”, nispa. Paykunañataqmi nirqaku: “Qampas hinaspa wasikipi kaqkunapas Jesuspim iñinaykichik”, nispa. Pablowan Silas Diospa palabranmanta yachachiptinkum chay runaqa aylluntin bautizakururqa.