Sauloqa Roma nacionniyuqmi karqa, payqa Tarso llaqtapim nacerqa. Hinaspapas judiokunapa yachachisqanta alli-allinta riqsiq fariseo runam karqa. Jesuspa qatiqninkunatam ichaqa chiqniq, hinaspam wasinkumanta hawaman qatataspan presochachiq. Estebanta rumiwan wañuchiptinkupas allinpaqmi hapirqa.

Chaymantapas Sauloqa sacerdotekunapa jefentam mañakurqa Damasco llaqtapipas Jesuspa qatiqninkunata ñakarichinanpaq. Chaymi chay llaqtaman chayaykuchkaptin qunqayllamanta achki kanchaykurqa, hinaptinmi Sauloqa pampaman wichiykuspan uyarirqa: “Saulo, ¿imanasqataq qatikachawanki?”, niqta. Sauloñataqmi tapurqa: “¿Pitaq kanki?”, nispa. Hinaptinmi nimurqa: “Jesusmi kani. Hatarispaykiyá Damasco llaqtaman yaykuy, chaypim imam ruwanaykipaq nisunki”, nispa. Hinaptinmi Sauloqa ñawsayarurqa, chaymi aysaspaña llaqtaman chayachirqaku.

Damasco llaqtapim Ananias sutiyuq Jesuspa qatiqnin yacharqa. Paytam musquyninpi hina Jesus kamachirqa Saulota maskaq rinanpaq. Hinaptinmi Ananias nirqa: “Uyarirqanim qatiqnikikunata chay Saulo ñakarichisqanmanta”, nispa. Chaymi Jesus nirqa: “Paytam akllaruni achka nacionkunapi Diosmanta willakunanpaq”, nispa.

Sauloman chayaruspanmi Ananias nirqa: “Wawqilláy, Jesusmi kachamuwarqa kaqmanta qawarikunaykipaq”, nispa. Chayllam Sauloqa qawarikururqa, hinaspapas Jesusmanta yacharuspanmi bautizakururqa, hinaspam iñiqmasinkunapiwan yupaychana wasikunapi willakurqa. Chayta qawaspankum judiokunaqa tapunakurqaku: “¿Manachu kay runaqa Jesuspa qatiqninkunata qatikachaq?”, nispa.

 Chay Damasco llaqtapim Sauloqa kimsa wata willakurqa. Judiokunañataqmi wañuchinankupaq tantearurqaku. Iñiqmasinkunam ichaqa, llaqtapa muyuriqnin pirqapa ventananta Saulota canastapi uraykachirqaku mana wañurachinankupaq.

Jerusalenman rispanqa iñiqmasinkunamanmi Sauloqa waturqa, paykunam ichaqa Saulota manchakuqku. Jesuspa qatiqnin Bernabeyñataqmi apostolkunaman Saulota pusarurqa, hinaspam suma-sumaqta willarqa Sauloqa manaña ñawpaqpi hina kasqanmanta. Sauloqa paykunawan kuskañam kusikuyllawanña Diosmanta Jerusalenpi willakurqa. Tiempopa risqanman hinam Saulotaqa Pablowanña suticharurqaku.