Saul wañukuptinmi Davidña 30 watanpi kachkaspan kamachiyta qallaykurqa. Huk tutam Davidqa wasinpa hawanpi purikuchkaspan kuyayllapaq warmita rikururqa. Hinaspanmi tapuchimuspan yacharurqa chay warmipa sutinqa Bat-seba kasqanta hinaspa soldadon Uriaspa warmin kasqanta. Chaywanpas qayarachispanmi paywan puñukururqa, chaynapim Bat-sebaqa wiksayakururqa. Huchallikusqanta mana yachanankupaqmi, Davidqa kamachirqa tropakunapa puntanman Uriasta churaruspanku sapallanta saqirunankupaq, chaynapim Uriasta wañurachirqaku. Chaymantam Davidqa Bat-sebawan casarakururqa.

Jehova Diosmi ichaqa Davidpa huchallikusqanta rikurqa, hinaspanmi Natanta kacharqa Davidman kaynata willananpaq: “Huk apu runapam karqa achkallaña ovejankuna, wakcha runapañataqmi chullachalla. Chay ovejachantam anchata kuyarqa, ichaqa apu runam qichuruspan nakakururqa”, nispa. Davidñataqmi piñasqallaña nirqa: “¡Chay apu runaqa wañunanmi!”, nispa. Natanñataqmi nirqa: “¡Chay apu runa hinam qampas kanki!”, nispa. Chaymi Davidqa llumpayta llakikuspan Natanta nirqa: “Diospa qayllanpim huchallikuruni”, nispa. Huchallikusqanraykum Davidqa aylluntin sasachakuykunapi tarikurqa. Diosqa Davidtam castigarurqa, ichaqa sunqumanta wanakuptinmi mana wañurachirqachu.

Chaymantam Davidqa Diospa wasinta ruwayta munarqa, ichaqa Diosmi Salomonta akllarurqa wasinta ruwananpaq, Salomonqa Davidpa churinmi karqa. Chaymi Davidqa churin ruwananpaq tukuy imata allichayta ­qallaykurqa, hinaspam nirqa: “Diospa wasinqa suma-sumaqmi kanan. Churiyqa warmallaraqmi, chaymi yanapasaq”, nispa. Chaymi Davidqa achka-achka quri-qullqita qurqa. Maskarqataqmi allin llamkaqkunatapas, hinaspapas cedro sachatam Tiromantawan Sidon nacionmanta apachimurqa. Wañukunanpaqña kachkaspanmi payqa churin Salomonman qurqa Diospa wasinpa planonta, hinaspam nirqa: “Jehova Diosmi niwarqa wasinta imayna ruwanaykipaq qamta yachachinaypaq. Paymi yanapasunki, ama manchakuychu”, ­nispa.