Jeosafatqa Juda naciontam kamachirqa, hinaspam Baal taytachatawan huk taytachakunata chinkarachirqa. Jeosafatqa munarqam runankuna Jehova Diosta kasukunankuta, chaymi yanapaqninkunatawan Leviy ayllumanta kaqkunata kamachirqa nacionninpi runakunaman Diospa kamachikuyninkunamanta yachachinankupaq.

Jehova Diosñataqmi Juda nacionta yanaparqa, chaymi hichpanpi llaqtakunapas manchakuqku, hinaspam regalokunata Jeosafatman apaqku. Ammonmanta, Moabmanta chaynataq Seir urqumanta runakunam ichaqa Juda nacionpa contranpi hatarirurqaku. Chaymi Jeosafatqa Jerusalenpi qarikunata, warmikunata hinaspa warmakunata huñuykuspan paykunapa qayllanpi Jehova Diosta mañakurqa: “Diosllayku, yanapaykullawayku. Mana yanapawaptikikuqa manam venceyta atillaymankuchu. Niwaykuyá imatapas ruwanaykupaq”, nispan.

Mañakusqanta uyariykuspanmi Jehova Diosqa nirqa: “Allinta sayaspayá takyaychik. Qawankichikmi imayna yanapasqayta. Amayá manchakuychikchu”, nispa.

Paqarinnintinmi Jeosafatqa takiqkunata akllaspan nirqa: “Guerraman lluqsiqkunapa puntantam takistin rinkichik”, nispa. Paykunaqa Jerusalenmantam lluqsirqaku Tekoa sutiyuq chunniqman.

Chaypi lliw kallpankuwan hinaspa kusikuywan takichkaptinkum Jehova Diosqa Ammon ­hinaspa Moab runakunata pantanarachirqa, chaymi kikinkupura wañurachinakurqaku. Juda nacionpa soldadonkunawan sacerdotekunam ichaqa Dios harkaykuptin mana wañurqakuchu. Chayta uyariruspankum hichpankupi yachaqkunaqa Juda nacionwan Jehova Dios kasqanta yacharurqaku. Jehova Diosqa tukuy imata ruwaspanmi yupaychaqninkunata yanapan. Paypa makillanpimá imapas kachkan.