Jezabelpa warmi wawanmi karqa Atalia. Paymi Juda nacionta kamachiqwan casarakururqa. Ataliaqa maman hina mana allin warmim karqa. Qusan wañukuptinmi wawanña kamachirqa, wawanpas wañukuptinmi qusanpa lliw qari churinkunatawan ayllunkunata wañurachirqa payña kamachinanpaq. Kikinpa willkankunatapas wañuchirqam. Chayraykum Ataliataqa lliw runakuna manchakuqku.

Sacerdotekunapa kamachiqnin Jeoyadam ichaqa warmin Jeosebapiwan wañuytapas mana manchakuspanku, Ataliapa willkan Jehoasta Diospa wasinpi pakaspa uywarqaku, Jehoasqa wawallaraqmi karqa.

Qanchis watayuqña Jehoas kaptinmi Jeoyadaqa soldadokunapa llapallan kamachiqninkunatawan Leviy ayllukunata Diospa wasinman qayarachirqa, hinaspam nirqa: “Amam pipas yaykumunqachu”, nispa. Chaymantam Jeoyadaqa Jehoaspa umanman coronata churaykurqa Juda nacionta kamachinanpaq. Chaymi lliw runakuna qaparirqaku: “¡Kawsachun kamachiwaqninchik!”, nispanku.

Chayna qapariqta uyariruspanmi kamachiq Ataliaqa Diospa wasinman kallparqa. Chaypim musuq kamachiqta rikuruspan qaparirqa: “¡Kaywanqa qipanchawachkankichikmi!”, nispa. Soldadokunapa kamachiqninkunañataqmi Ataliata hawaman hurquruspa wañurachirqaku. Ataliaqariki mana ­allinta ruwaspam runakunata huchallichiq. ¿Imam chaymanta karqa?

Chaymantam Jeoyadaqa llapallan ­runakunawan rimanakurqa Jehova ­Diosllata yupaychanankupaq, chaymi Baalpa wasintawan taytacha-­mamachakunata chinkarachirqa. Chaymantapas Jeoyadaqa Leviy ­ayllumanta kaqkunatawan sacerdotekunatam ­kamachirqa Diospa wasinpi llamkanankupaq, chaynapi runakuna kaqmanta chaypi Diosta yupaychanankupaq. Churarqataqmi soldadokunatapas, chaynapi Diospa wasinman huchankumanta mana wanakuqkuna mana ­yaykunankupaq. Chaymantañataqmi soldadokunata kamachiqkunawan Jeoyadaqa kamachiqpa tiyananpi Jehoasta tiyachirqa. Llapallan ­runakunam chaywan kusikurqaku, Atalia wañuruptinqa hawkañam Jehova Diosta ­yupaycharqaku.