Jezabelpa wawan Atalia warmim Juda nacionta kamachiqwan casarakururqa. Ataliaqa maman hina mana allin warmim karqa. Qusan wañukuptinmi wawanña kamachirqa, wawanpas wañukuptinmi qusanpa lliw qari ayllunkunata wañurachirqa payña kamachinanpaq, kikinpa willkankunatapas wañuchirqam. Chayraykum Ataliataqa lliw runakuna manchakuqku.

Sacerdotekunapa jefen Joiadam ichaqa Josaba warminpiwan wañuyta mana manchakuspanku, Ataliapa willkan Joasta Diospa wasinpi pakaspa uywarqaku.

Qanchis watayuqña Joas kaptinmi Joiadaqa llapallan jefekunatawan Leviy ayllukunata Diospa wasinman qayarachirqa, hinaspam nirqa: “Amam pipas yaykumunqachu”, nispa. Chaymantam Joiadaqa Joaspa umanman coronata churaykurqa Juda nacionta kamachinanpaq. Chaymi lliw runakuna qaparirqaku: “¡Kawsachun kamachiwaqninchik!”, nispanku.

Chayna qapariqta uyariruspanmi kamachiq Ataliaqa Diospa wasinman kallparqa. Chaypim musuq kamachiqta rikuruspan qaparirqa: “¡Kaywanqa qipanchawachkankichikmi!”, nispa. Jefekunañataqmi runakuna ñakarichiq Ataliata hawaman hurquruspa wañurachirqaku.

Chaymantam Joiadaqa llapallan runakunawan rimanakurqa Jehova Diosllata yupaychanankupaq, chaymi Baalpa wasintawan taytacha-mamachakunata chinkarachirqa. Chaymantapas Joiadaqa Leviy castakunatawan sacerdotekunatam kamachirqa Diospa wasinpi llamkanankupaq.  Churarqataqmi soldadokunatapas, chaynapi Diospa wasinman huchankumanta mana wanakuqkuna mana yaykunankupaq. Chaymantañataqmi Joiadaqa kamachiqpa tiyananpi Joasta tiyachirqa. Atalia wañuruptinqa runakunam hawkaña Jehova Diosta yupaycharqaku.