1. Kay qillqapi yacharuspayki, ¿imatam ichapas tapukunki?

KAY qillqapim yacharunki wiñay kawsayta Dios quwananchikmanta, wañuqkuna imayna kasqankumanta hinaspa wañuqkuna kawsarimunankumanta (Eclesiastes 9:5; Lucas 23:43; Juan 5:28, 29; Apocalipsis 21:3, 4). Ichapas Jehova Diospa testigonkunapa huñunakuyninkuman richkankiña hinaspa paykuna chiqap religion kasqantapas  musyakurunkiña (Juan 13:35). Ichapas Jehova Diostapas kuyachkankiña hinaspa paypa munaynintapas ruwaytaña munachkanki. Chaynaqa ichapas tapukunki: “¿Imatawanmi ruwanay Diospa munayninta ruwanaypaq?”, nispa.

2. Etiopia nacionniyuq runaqa, ¿imanasqam bautizakuyta munarqa?

² Chaynatam tapukurqa apostolkunapa tiemponpi Etiopia nacionniyuq runa. Jesuspa kawsarisqan qipatam, chay runaman Felipe sutiyuq runa Diosmanta willarqa hinaspapas willarqam Jesusqa Diospa akllasqan kasqanta. Chayta yachasqanwanmi Etiopia nacionniyuq runaqa anchata kusikurqa, chaymi nirqa: “¡Kayqaya yakuqa! ¿Imaraqtaq faltawan bautizakunaypaq?”, nispa (Hechos 8:26-36).

3. (1) ¿Imatam Jesusqa qatiqninkunata kamachirqa? (2) ¿Imaynatam pipas bautizakunan?

³ Diospa munayninta ruwanaykipaqqa bautizakunaykim, chaytam biblia nin. Jesusmi qatiqninkunata kamachirqa: “Llapallan nacionpi runakunaman rispayá yachachimuychik qatiqniykunaña kanankupaq, hinaspayá bautizamuychik”, nispa (Mateo 28:19). Chaytam kikin Jesuspas ruwarqa. Jesus bautizakuptinqa manam aslla yakutachu umanman challarqaku, aswanqa enteron cuerpontam yaku ukuman chinkaykachirqa (Mateo 3:16). Chaynam kunanpas bautizakuqkunaqa enteron cuerponkuta yaku ukuman chinkaykachinanku.

4. Bautizakuspanchikqa, ¿imatam hukkunaman qawachinchik?

 ⁴ Bautizakuspaqa hukkunamanmi qawachinchik Dioswan kuyachikuyta munasqanchikta hinaspa munayninta ruway munasqanchiktapas (Salmo 40:7, 8). Chaynaqa ichapas tapukunki: “¿Imatam ruwanay bautizakunaypaq?”, nispa.

5. (1) ¿Imatam ruwanayki manaraq bautizakuchkaspayki? (2) ¿Imanasqam huñunakuykunaman riytaqa mana saqinaykichu?

⁵ Manaraq bautizakuchkaspaykim, Jehova Diostawan Jesusta riqsinayki. Chay ruwaytaqa qallaykurqanki biblia estudiayta qallaykusqaykimantam (qaway Juan 17:3). Ichaqa, ¿imatawanraqmi ruwanayki? Bibliam nin ‘Diospa munayninmanta imam kaqta llapallanta yachanaykipaq’ (Colosenses 1:9). Jehova Diospa testigonkunapa huñunakuyninkuman risqaykim yanapasunki astawan Jehova Diosta kuyanaykipaq. Chayraykum mana saqinaykichu huñunakuykunaman riytaqa (Hebreos 10:24, 25).

6. Bautizakunaykipaqqa, ¿imatam ruwanayki?

⁶ Jehova Diosqa manam nisunkichu: “Bautizakunaykipaqqa bibliapa tukuy ima nisqantaraqmi yachanayki”, nispaqa. Manam chaynatachu nirqa Etiopia nacionniyuq runatapas manaraq bautizakuchkaptinqa (Hechos 8:30, 31). Ichaqa, hinallam Jehova Diosmantaqa yachasunchik (Eclesiastes 3:11). Bautizakunaykipaqqa yachanaykim bibliapi chiqap yachachikuykunata hinaspam chayman hina kawsanayki (Hebreos 5:12).

7. ¿Imapaqmi bibliamanta yachasqaykiqa yanapasurqanki?

 ⁷ Bibliam nin: “Mana iñiyniyuq kaspaqa manapunim Diostaqa kusichichwanchu”, nispa (Hebreos 11:6). Chaynaqa, iñiyniyuqmi kanayki bautizakunaykipaqqa. Bibliapiqa nintaqmi Corinto llaqtapi wakin runakuna Jesuspa qatiqninkunapa willakusqankuta uyarisqankumanta hinaspa iñispanku bautizakusqankumanta (Hechos 18:8). Qamtapas bibliamanta yachasqaykim yanapasurqanki, Diospa nisqankuna ruwakunanmanta mana iskayrayanaykipaq hinaspa Jesuspa wañukusqanpi iñinaykipaqpas. Jesuspa wañusqanwanmi huchamantawan wañuymanta librakuyta atinchik (Josuey 23:14; Hechos 4:12; 2 Timoteo 3:16, 17).

8. ¿Imataq kallpanchasunki yachasqaykimanta willakunaykipaq?

⁸ Bibliamanta astawan yachaptikiqa hinaspa kawsakuynikipi yanapasusqaykita qawaptikiqa iñiynikim astawan yapakunqa. Chaymi astawan munanki yachasqaykikunamanta willakuyta (Jeremias 20:9; 2 Corintios 4:13). Ichaqa, ¿pimantaq willakuwaq?

9, 10. (1) ¿Pikunamanmi willakuwaq bibliapi yachasqaykikunata? (2) ¿Imatam ruwanayki Jehova Diospa testigonkunawan kuskaña willakuyta munaspaykiqa?

⁹ Ichapas yachasqaykikunamanta willakuwaq aylluykikunaman, amistadnikikunaman, vecinoykikunaman, estudiaqmasikikunaman utaq llamkaqmasikikunaman. Chayta ruwasqaykiqa  allinmi. Ichaqa kuyakuywan hinaspa respetowanmi rimanayki. Punchawkuna risqanman hinam, Jehova Diospa testigonkunawan kuskaña willakunki. Chayta ruwanaykipaq hinaña tarikuspaykiqa, bibliamanta yachachisuqnikiwan rimay Diosmanta willakuytaña munasqaykita. Bibliamanta yachachisuqniki lluqsinaykipaq hinaña kasqaykita nisuptikiqa hinaspa bibliapa yachachisqanman hina kawsaptikiqa, iskaynikichikmi iñiqkunapi iskay punta apaqkunawan huñunakuwaqchik.

¹⁰ Chaypim, punta apaqkuna qanwan rimanqaku bibliapi chiqap yachachikuykunata entiendesqaykimanta willakunaykipaq. Chaymantapas nisunkim imanasqa Jehova Diospa testigon kayta munasqaykimanta. Punta apaqkunaqa llapan iñiqmasinkunamantam nanachikunku, qanwanpas chaytam ruwanqaku. Chaynaqa manam manchakunaykichu paykunawan rimaytaqa (Hechos 20:28; 1 Pedro 5:2, 3). Rimayta tukuruptikichikmi, punta apaqkunaqa nisunki Diosmanta willakuq lluqsinaykipaqña utaq manaraqpas.

11. Diosmanta willakuq lluqsinaykipaqqa, ¿imanasqam imapas mana allin ruwaytaqa saqinayki?

¹¹ Wakinpiqa ichapas iñiqkunapi punta apaqkunaqa nisunki imapas mana allin ruwayta saqinaykipaq. ¿Imanasqam chay nisusqaykita kasukunayki? Diosmanta willakuspanchikqa paypa sutintam apanchik. Chaymi imayna kawsakusqanchikqa  Diospa munasqanman hina kanan (1 Corintios 6:9, 10; Galatas 5:19-21).

12. ¿Imanasqam llapanchik wanakunanchik?

¹² ¿Imatawanraqmi ruwanayki manaraq bautizakuchkaspayki? Apostol Pedrom nirqa: “Huchaykichikmantayá wanakuychik hinaspa Diosman kutirikuychik huchaykichik pampachasqa kananpaq”, nispa (Hechos 3:19). ¿Ima ninantaq wanakuyqa? Mana allinkuna ruwasqanchikmanta pesapakuymi. Ichapas huchapakurqanki, chayna kaptinqa wanakunaykim. Allin kaqllata ruwanaykipaq kallpanchakuspaykipas, ¿wanakunaykichu? Arí, llapanchikmi huchayuq kanchik hinaspa Dios pampachawananchikta munanchik (Romanos 3:23; 5:12).

13. ¿Ima ninantaq Diosman kutirikuyqa?

¹³ ¿Pesayllachu-pesapakunanchik imapas ruwasqanchikmanta? Manam, apostol Pedrom nirqa: “Diosman kutirikuychik”, nispa. Kaywanqa nichkanmi ñawpaqta imapas mana allinkuna ruwasqaykita saqinaykimanta hinaspa allin kaqtaña ruwanaykipaq. Kaypi yuyaymanay: Mana riqsisqayki llaqtamanmi chayllaraq illachkanki. Chaymantam musyakurunki huk lawman risqaykita. ¿Imatam ruwawaq? Yaqa llapanpim kaqmanta kutirimunchik hinaspa kaqmanta chay risqanchik llaqta lawman rinchik. Yaqa chaynam bibliata estudiaspaykipas musyakunki imapas  mana allin ruwaykunata saqinaykimanta. Chaynaqa kaqmantam Diosman kutinayki utaq chay mana allin ruwaykunatam saqinayki hinaspam allin kaqtaña ruwanayki.

14. ¿Imatam ruwananchik Diosta yupaychanapaq tanteakuspaqa?

¹⁴ Chaymantapas manaraq bautizakuchkaspaykim Diosta yupaychanaykipaq tanteakunayki. Pipas chay ruwayta munaspanqa, Jehova Diosta sapallan mañakuspanmi ninan payllata yupaychananpaq hinaspa paypa munaynin imamantapas puntapi kananpaq (Deuteronomio 6:15).

15, 16. ¿Imanasqam Diosta yupaychanapaq tanteakunchik?

¹⁵ Casarakunanpaq riqsinakuq warmi-qariqa anchata kuyanakuspankum casarakunku hinaspam wañukunankukama kuska kawsakunankupaq prometenakunku. Chayta tanteayqa manam pukllay hinallachu, qariqa warma yananta kuyasqanraykum paypaq tukuy imata ruwan. Chaynam Jehova Diospa munayninta ruwanapaqpas prometekunchik.

¹⁶ Jehova Diosta astawan riqsisqaykiman hinam, astawan kuyanki hinaspapas paypa munayninta ruwanaykipaqmi tukuyta ruwanki. Chayraykum payta yupaychanaykipaqpas tanteakunki. Jesusmi qatiqninkunata nirqa: ‘Pipas qatiwayta munaqqa, amañayá kikillanpaqqa kawsachunchu’, nispa (Marcos 8:34). Manaña kikillanchikpaq kawsaspaqa Jehova Diostam tukuy imapi  kasukusunchik. Manam kikillanchikpa munasqanchiktañachu ruwasunchik, aswanqa Jehova Diospa munasqantañam (qaway 1 Pedro 4:2).

17. ¿Imanasqam wakin runakunaqa mana munankuchu Diosta yupaychanankupaq tanteakuyta?

¹⁷ Wakin runakunam Jehova Diosta yupaychanankupaq tanteakuyta mana munankuchu. ¿Imanasqa? Manchakunkum payman prometekusqankuta mana ruway atinankumanta. Ichapas pantaruyta manchakunku. Utaq piensanku: “Jehova Diosqa manam cuentata mañawasunchu payta yupaychanapaq mana tanteakuptinchikqa”, nispanku.

18. ¿Imataq yanapasunki manchakuynikita atipanaykipaq?

¹⁸ Jehova Diosta kuyasqaykim yanapasunki manchakuynikita atipanaykipaq. Yanapasunkitaqmi Diospa munayninta ruwaypi kallpanchakunaykipaq (Eclesiastes 5:4; Colosenses 1:10). Manam sasachu kanqa Diospa munayninta ruwayqa. Apostol Juanmi nirqa: “Diosta kuyayqa kamachikuyninkunata kasukuymi, kamachikuyninkunaqa manam llumpay sasachu”, nispa (1 Juan 5:3).

19. ¿Imanasqam mana manchakunaykichu Diosta yupaychanaykipaq tanteakuytaqa?

¹⁹ Manam mana pantaqraqchu kananchik Diosta yupaychanapaq tanteakunapaqqa. Payqa manam mañawanchikchu mana ruway atisqanchiktaqa  (Salmo 103:14). Chaymantapas, Jehova Diosqa yanapasunkim allin kaqta ruwanaykipaq (Isaias 41:10). Bibliapa nisqanman hinam, payqa “munasqanman hina kawsachisunki”. Chaynaqa tukuy sunquykiwan Jehova Diospi hapipakuy (Proverbios 3:5, 6).

20. ¿Imatam ruwanayki Diosta yupaychanaykipaq tanteakuruspaykiqa?

²⁰ ¿Yaqachu Jehova Diosta yupaychanaykipaq tanteakurunkiña? Chayna kaptinqa, ñam bautizakuwaqña.

21, 22. ¿Imaynatam “runakunapa qayllanpi” Diospi iñisqaykita qawachiwaq?

²¹ Punta apaq iñiqmasinchikta niy Diosta yupaychanaykipaq tanteakuruspayki bautizakuytaña munasqaykimanta. Paymi wakin punta apaqkunata ninqa bibliamanta yachasqaykikunata yuyarinaykipaq. Paykunam nisunki sichu bautizakunaykipaq hinaña kasqaykita, hinaptinmi Jehova Diospa testigonkunapa hatun huñunakuyninkupi bautizakunki. Chay hatun huñunakuypim yachachinqa bautizakuy ima ninan kasqanta. Puntamanta yachachimuq iñiqmasinchikmi iskay tapukuykunata ruwanqa llapallan bautizakuqkunapaq. Chay tapukuykunata kutichispaykim “runakunapa qayllanpi” Diospi iñisqaykita qawachinki (Romanos 10:10).

²² Chaymantam qamqa bautizakunkiña. Chaypaqqa  yaku ukumanmi challpusunki chinkaykunaykikama. Bautizakusqaykiwanmi llapallan chaypi kaqkunaman qawachinki Diosta yupaychanaykipaq tanteakusqaykita hinaspa chay punchawmantapacha Jehova Diospa testigonña kasqaykita.

23. ¿Ima ninantaq “hanaq pacha taytapa, churinpa hinaspa chuya espiritupa sutinpi” bautizakuyqa?

²³ Jesusmi qatiqninkunata nirqa: “[Bautizakuychik] hanaq pacha taytapa, churinpa hinaspa chuya espiritupa sutinpi”, nispa (qaway Mateo 28:19). Chaywanqa, ¿imatam nichkarqa? Riqsikunanchikmi  Jehova Dios kamachiqninchik kasqanta, Diospa munayninpi Jesuspa ima ruwasqanta hinaspa munayninta ruwananchikpaq chuya espiritunta Jehova Dios servichikusqanta (Salmo 83:18, NM; Mateo 28:18; Galatas 5:22, 23; 2 Pedro 1:21).

24, 25. (1) ¿Imawanmi tupan bautizakuyqa? (2) ¿Imamantam qatiqnin yachachikuypi yachasunchik?

²⁴ Bautizakuspaykim yaku ukuman chinkaykunki, chaywanmi qawachinki wañuchkaq hina ñawpaqpi mana allinkuna ruwasqaykikunata saqisqaykita. Yakumanta lluqsimuspaykiñataqmi musuq runa hinaña Jehova Diospa munayninta ruwayta qallarinki. Chaynatam qawachinki bautizakusqayki punchawmantapacha Diospa yupaychaqninña kasqaykita. Manam runakunata utaq imatapas yupaychanaykipaqchu tanteakurqanki, aswanqa Jehova Diosta yupaychanaykipaqmi tanteakurqanki.

²⁵ Chay ruwasqaykim yanapasunki Jehova Diosta astawan kuyanaykipaq (Salmo 25:14). Ichaqa manam bautizakusqaykiraykuqa niwaqchu salvasqaña kasqaykitaqa. Apostol Pablom kaynata qillqarqa: “Hinalla kallpanchakuychik Dios salvasunaykichikpaq”, nispa (Filipenses 2:12). Chaynaqa, bautizakuspaykiqa chayllaraqmi Dios yupaychayta qallarichkanki. Hinaptinqa, ¿imaynatam Jehova Dioswan hinalla kuyachikuwaq? Qatiqnin yachachikuypim chaymanta yachasunchik.