Jehová Diosqa Abrahanpa mirayninkunaman kamachikuyninkunata qospanmi organizasqa hatun nacionta hatarichirqa Diospa Palabranmanta yachasqankutawan cheqap yupaychayninkuta waqaychanankupaq. Chay nacionmi Israelwan sutichakurqa (Salmo 147:​19, 20). Organizasqa kasqankuwanmi kunankamapas runakunaqa Allpantinpi bendecisqa kanku. Leey Genesis 22:18.

Abrahanpa mirayninkunatam Diosqa akllarqa testigonkuna kanankupaq. Diospa kamachisqankunata kasukuyninkuqa allinninkupaqmi karqa (Deuteronomio 4:6). Chayna kasukusqankum hukkunatapas yanaparqa cheqap Diosta reqsinankupaq. Leey Isaias 43:​10, 12.

Akllasqa Israel llaqtan favorninta yanqacharuptinmi Jehová Diosqa cristianokunataña paykunapa rantinpi favorecerqa (Mateo 21:43; 23:​37, 38). Chaymi kunanqa cheqap cristianokunataña testigonkuna kanankupaq favorecen, manañam israelitakunatañachu. Leey Hechos 15:​14, 17.

Jesusmi qatiqninkunata organizarqa enteron pachapi imaynata predicanankupaq chaynataq qatiqninkuna kananpaq yachachinankupaqpas (Mateo 10:​7, 11; 24:14; 28:​19, 20). Kay tukupay tiempopim chayqa Allpantinpi astawan rurakuchkan. Jehová Diosqa wara-waranqantin runakunatam lliw nacionkunamanta huñuchkan cheqap yupaychaypi kanankupaq (Apocalipsis 7:​9, 10). Cheqap cristianokunaqa organizasqa kasqankuraykum yanapanakunku chaynataq kallpanchanakunku. Huñunakuyninkupipas Diospa yachachikuyninkunamantam enteron pachapi hina kaqllata yachanku. Leey Hebreos 10:​24, 25.

1870 kaq watapim Bibliata estudiaq pisi runakunalla cuentata qokururqaku Bibliapa cheqap yachachikuyninkunamanta runakuna mana yachasqankuta. Jesuspa qatiqninkunaqa predicanankupaq organizasqa kasqankumanta yacharuspankum Diospa Gobiernonmanta achka nacionkunapi predicayta qallaykurqaku. 1931 kaq watapim Jehová Diospa testigon nispa sutichakurqaku. Leey Hechos 1:8; 2:​1, 4; 5:​42.

Apostolkunapa tiemponpi tukuy hinastinmanta kaq cristianokunapaqqa karqam Jerusalenpi umalliqninku otaq punta apaqninku, paykunaqa reqsikurqakum Kamachiqninkuqa Jesucristo kasqanta (Hechos 16:​4, 5). Chaynallataqmi kay tiempopipas Jehová Diospa testigonkunapaqqa iñiyninkupi allin takyasqa Punta Apaqninku kan, paykunam Allpantinpi Betel wasikunamanta cuentallikunku. Chay wasikunapim Bibliapa yachachisqanman hina 600 masnin rimaykunapi tikranku, qellqakunata ruranku hinaspa aypunku. Diospa Llaqtanpi Punta Apaqkunaqa Bibliapa yachachisqanman hinam pachak waranqa masnin congregacionpi iñiqmasinkuta yanapanku, chaykunapiqa kantaqmi iñiqmasinkuta kuyakuywan yanapaq ancianokunapas. Leey 1 Pedro 5:​2, 3.

Jehová Diospa testigonkunaqa organizasqam kachkanku allin noticiamanta willakunankupaq chaynataq Jesuspa qatiqnin kanankupaq hukkunata yanapanankupaqpas. Apostolkuna hinam wasin-wasin predicanku (Hechos 20:20). Bibliapa cheqap yachachisqanmantam yachay munaqkunaman yachachinku. Paykunaqa manam organizasqallachu kanku, wawqe-panintin hinam kuyanakuspa Diospa amparasqan kawsakunku (2 Tesalonicenses 1:3). Jehová Diospa testigonkunaqa kallpanchakunkum paypa munasqanman hina kawsanankupaq chaynataq hukkunatapas yanapanankupaq, Allpantinpim ancha kusisqa kawsakunku. Leey Salmo 33:12; Hechos 20:35.