Diosmi kallpanchan lliw runakunata oracionnintakama payman asuykunankupaq (Salmo 65:2). Manam ichaqa lliw runapa mañakusqantachu uyarin. Bibliam nin, señoranta ñakarichiq runapa mañakusqantaqa Dios mana uyarisqanta (1 Pedro 3:7). Ñawpa tiempopi serviqnin israelitakuna sapa kutilla mana allinta ruraptinkum Diosqa mana uyarirqachu mañakusqankuta. Ichaqa huchanmanta wanakuspa mañakuqtam uyarin. Leey Isaias 1:​15; 55:7.

Qaway “¿Lliw runapa mañakusqantachu Diosqa uyarin?” niq videota.

Orakuspam Diosta yupaychanchik, chaymi Jehová Diosllata mañakunanchik (Mateo 4:​10; 6:9). Huchallikuq kasqanchikraykum Jesuspa sutinpi mañakuna, paymi huchanchikrayku wañurqa (Juan 14:6). Jehová Diosqa manam munanchu rezakunanchiktaqa otaq leespa mañakunanchiktaqa, orakunanchikqa sonqonchikmantam. Leey Mateo 6:7; Filipenses 4:​6, 7.

Unanchawaqninchikqa uyarinmi sonqollanchikpi mañakusqanchiktapas (1 Samuel 1:​12, 13). Paymi kallpanchawanchik imay horapas orakunanchikpaq; mañakuchwanmi hatarinapaq, puñunapaq, mikunapaq hinaspa ima sasachakuypi tarikuspapas. Leey Salmo 55:22; Mateo 15:36.

Mana iñiyniyoq runakunapa kasqanpim kawsanchik, paykunaqa burlakunkum Allpa pachapi hawkayay kananpaq Diospa prometesqanmanta. Chaykunam sasachawachwan Diosman asuykunapaq kallpanchakusqanchikpi (2 Timoteo 3:​1, 4; 2 Pedro 3:​3, 13). Chaymi Diosman asuykunapaqqa  Diosta serviq cristianokunawan huñunakunanchik. Paykunapas necesitankum kallpanchananchikta. Leey Hebreos 10:​24, 25.

Jehová Dios kuyaqkunawan huñunakuspaqa astawanmi payman asuykusun. Testigonkunawan huñunakusqanchikmi iñiyninchikpi yanapawasun, chaypim tarisun iñiyninkupi suni kaqkunata. Leey Romanos 1:​11, 12.

Diosmanta yachasqaykikunapi yuyaymanaspam. Yuyaymanaytaq rurasqankunapi, imayna consejasqankunapi chaynataq prometesqankunapipas. Yuyaymanasqanchikwan mañakusqanchikmi yanapawasun Diosqa ancha kuyakuq hinaspa yachayniyoq kasqanmanta entiendenapaq. Leey Josuey 1:8; Salmo 1:​1-3.

Confianzawanmi Diosman asuykuyta atinki paypi iñispaqa. Iñinapaqqa Diospa Palabrantam sapa kuti estudiana, chaypaqqa imamantapas yachasqanchikkunapim yuyaymanana. Leey Mateo 4:4; Hebreos 11:​1, 6.

Jehová Diosqa kuyaqninkunapim reparan. Wiñay kawsaypi suyakuyniki mana yanqachakunanpaqmi amparasunki (Salmo 91:​1, 2, 7-10). Imakunamantapas cuidakunaykipaqmi chaynataq imaynata astawan kusisqa kawsakunaykipaqmi yachachisunki. Leey Salmo 73:​27, 28; Santiago 4:​4, 8.